Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 278 Hüküm no: 300 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd Ağa b. Abdülmennân’ın evini oğlu Abdülbâki Çelebi’ye hibe ettiği Mahmiye-i Galata kazâsına tâbi‘ Sarıyar nâm karye sâkinlerinden fahrü’l-akrân Kurd Ağa b. Abdülmennân nâm tabbâh-ı sultânî meclis-i şer‘-i celîlü’ş-şânda, sulbî oğlu râfi‘ü’l-kitâb Abdülbâkī Çelebi nâm şâb mahzarında ikrâr-ı sahîh-i şer‘î ve i‘tirâf-ı sarîh-i mer‘î eyleyip hâlâ silk-i mülk-i sahîhime dâhil olup karye-i mezbûrede vâki‘ bir tarafı hâlâ Kapıcılar kethüdâsı Hasan Ağa b. Abdullah mülkü ve bir tarafı Kerestecizâde Mehmed Beşe b. ( ) mülkü ve bir tarafı sâhil-i bahr ve bir tarafı tarîk-i âm ile mahdûd bir bâb fevkānî ve bir bâb tahtânî beyti ve iki su kuyusunu ve ayazma ve eşcâr-ı müsmire ve gayr-ı müsmireyi ve bağı çayırlı hadîkayı müştemil olan menzili cümle tevâbi‘ ve levâhıkı ile oğlum mezkûr Abdülbâkī Çelebi’ye hibe-i sahîha-i şer‘iyye ile ba‘de’t-tahliye hibe ve teslîm ve temlîk eyleyip, ol dahi vech-i meşrûh üzre ittihâb ve kabz ve kabûl eyledi ve menzil-i mezbûrun hadd-i sâlisi olan sâhil-i bahre karîb mahalde deryâ içinde olup tasarrufu hakk-ı sırfım olan dalyanın dahi hakk-ı tasarrufu[nu] mezbûr Abdülkādir Çelebi’ye tefvîz eyleyip, ol dahi tefevvuz ve kabûl eyledi. Ba‘de’l-yevm menzil-i mahdûd-ı mezbûr mezkûr Abdülbâkī Çelebi’nin mülk-i mevhûbu ve zikr olunan dalyanın dahi hakk-ı tasarrufuna keyfe mâ yeşâ mutasarrıf olsun dedikde, ba‘de’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâsıtı Cemâziyelevvel li sene selâsin ve erba‘în ve elf. Şuhûdü’l-hâl: El-Hâc Sefer b. Abdullah, Cafer Ağa b. Süleyman, Mehmed Bey b. Hasan el-Cündî, Mustafa b. Abdullah et-tabbâh-ı sultânî.