Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 278 Hüküm no: 301 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye bt. Abdullah’ın Sertabi ve Rahime adlı cariyeler üzerinde hakkı kalmadığı Mahmiye-i Kostantıniyye’de Tahtaminâre mahallesinde bundan akdem müteveffât olan Raziye bt. Abdullah nâm Hâtun’un muhallefâtı bi’l-inhisâr zevc-i metrûkü Beyzâde Mehmed Çavuş b. Abdullah nâm kimesne ile mevlâ-yı mu‘takı Mehmed Çavuş b. Ramazan nâm kimesnenin li-ebeveyn ammi oğlunun oğlu ve usûbet-i nesebiyye ile vârisi olan Mehmed Çelebi b. Abdişah nâm kimesneye intikāl eylediği zâhir ve müte‘ayyin oldukdan sonra medîne-i Ebâ Eyyûb el-Ensârî mahallâtından Kasım Paşa mahallesinde sâkin olan Pürkadem Mehmed Çelebi meclis-i şer‘-i hatîrde işbu bâ‘isiyetü’l-kitâb Sertabi bt. Abdullah ve Rahime bt. Abdullah nâm hâtunlar mahzarlarında takrîr-i da‘vâ edip merkūmetân Sertabi ve Rahime mukaddemâ mûrisem müteveffât-ı mersûme Raziye Hâtun’un câriye-i memlûkeleri olup, ba‘de vefâtihâ muhallefâtının nısfı zevci merkūm Beyzâde Mehmed Çavuş’a ve nısf-ı âharı bana intikāl etmeğin merkūmetândan nısıf hissemi taleb ederim dedikde, gıbbe’s-suâl merkūmetân Sertabi ve Rahime cevâblarında, fi’l-vâki‘ mukaddemâ merkūme Raziye Hâtun’un câriye-i memlûkeleri idik, lâkin merkūme Sertabi’yi seyyidemiz merkūme Raziye Hâtun bundan esbak zevc-i nâkihi olan Mehmed b. Abdullah el-Hammâmî ile ber vech-i iştirâk on altı bin akçeye iştirâ edip ba‘dehû merkūme Raziye Hâtun semen-i merkūmun nısfı olan sekiz bin akçeyi zevci merkūm Mehmed’in yedinden alıp kabz edip merkūme Sertabi ile mezbûre Rahime ba‘de’l-yevm zevcim merkūm Mehmed’in câriye-i memlûkeleridir benim alâkam yokdur deyü hüccet ettirmekle mersûme Raziye Hâtun’un bizde alâkası kalmayıp biz hâlâ mu‘takayız deyü sene ihdâ ve erba‘în ve elf Zilka‘de’sinin evâili târihiyle müverraha ve ol târihde mahmiye-i merkūmede Balat mahkemesinde nâibü’ş-şer‘ olan Nuh b. eş-Şeyh Sinan imzâsıyla mümzât ve mefhûmu takrîr-i meşrûhlarına mutâbıka ve müdde‘âlarını nâtıka hüccet-i şer‘iyye ibrâz eylediklerinde, gıbbe’s-suâl ve akībe’l-inkâr, mazmûn-ı hüccet-i merkūmeye mutâbıka beyyine taleb olundukda, udûl-i Müslimîn’den ve zeyl-i kitâb-ı merkūmda mastûretü’l-esâmî olan Müslimîn’den Fazlullah Beşe b. Mehmed er-Râcil ve Abdi b. Ramazan nâm kimesneler li ecli’ş-şehâde hâzırân olup gıbbe’l-istişhâd, min külli’l-vücûh mazmûn-ı hüccet-i merkūmeye mutâbık edâ-i şehâdet-i şer‘iyye eylediklerinde, ba‘de ri‘âyet-i şerâiti’l-kabûl şehâdetleri makbûle olup müteveffât-ı merkūme Raziye Hâtun’un merkūmetân Sertabi ve Rahime’de bir vechile alâkası kalmadığı müte‘ayyin olıcak, merkūm Mehmed Çelebi bi gayri vech-i şer‘î ta‘arruzdan men‘ olunup, mâ vaka‘a bi’t-taleb ketb olundu. Tahrîren fî evâsıtı Cemâziyelevvel li sene selâsin ve erba‘în ve elf. Şuhûdü’l-hâl: Mehmed b. Mehmed el-İmâm, Abdülbâkī b. Ahmed el-Müezzin, Mehmed b. Cafer, Mehmed b. Abdullah er-Râcil, Hasan Beşe b. Ali er-Râcil, Ahmed Çelebi b. Mehmed, Ali b. Ahmed, Ahmed Beşe b. Abdullah er-Râcil, Mehmed b. Şaban, Hüseyin b. Hamza.