Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 279 Hüküm no: 302 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Canfeda bt. Abdullah’ın terekesinden Raziye bt. Mehmed Çavuş’un zimmetinin ibrâ edildiği Medîne-i Ebâ Eyyûb el-Ensârî -radiye anhu Rabbuhü’l-bârî- de Kasımpaşa mahallesinde sâkin Mehmed Beşe b. Abdi nâm râcil mahfil-i kazâda, mahmiye-i İstanbul’da Tahtaminâre mahallesinde sâkin iken müteveffâ olan Mehmed Çavuş b. Abdullah nâm kimesnenin sulbiye sagīre kızı Raziye’nin meclis-i şer‘den mansûb vasîsi olan râfi‘ü’l-kitâb Mahmud b. Abdullah nâm kimesne mahzarında ikrâr ve takrîr-i kelâm eyleyip mukaddemâ zikr olunan Tahtaminâre mahallesinde müteveffât olan Canfeza bt. Abdullah nâm hâtun babam mesfûr Abdi Şâh’ın ibn-i ammi olan diğer Mehmed Çavuş b. Ramazan nâm kimesnenin mu‘tekası olmakla verâseti, usûbet-i nesebiyye cihetinden bana ve zevci sagīre-i mezkûrenin babası mezkûr Mehmed Çavuş’a münhasıra olup, muhallefâtının nısfı bana ve nısfı mesfûr Mehmed Çavuş’a isâbet etmiş iken mezkûr Mehmed Çavuş müteveffâ-yı mesfûrun cümle altmış bin akçelik muhallefâtına vaz‘-ı yed ve benim verâsetimi ketm edip ve emîn-i beytülmâli için sekiz bin akçe ile def‘ ve iskāt etmeğin mâ‘adâsı olan elli iki bin akçe nısfını dahi kendisi ihlâk eylediğine mahzar-ı Müslimîn’de i‘tirâfından sonra müteveffâ olup, terekesine vasîyy-i mezbûr vâzı‘u’l-yed olmağın hâlâ mesfûr Mehmed Çavuş’un vech-i meşrûh üzre müteveffât-ı merkūmenin muhallefâtından makbûzu olan meblağ-ı mezbûrdan hisse-i şer‘iyyemi vasîyy-i mezbûrdan vech-i meşrûh üzre verâset-i mahkiyyem hasebiyle taleb eylediğimde, ba‘de’l-inkâr isbât sadedinde olup nizâ‘ ve husûmet üzre iken tavassut-ı Müslimîn ile beynimizde musâlaha vâki‘ olup ve sulh sagīre-i mezkûreye enfa‘ olmağın, vasîyy-i mezbûr ile merkūme Canfedâ’nın terekesinden müteveffâ-yı mezbûr Mehmed Çavuş’un makbûzu olan nısıf hisse-i şer‘iyyemi sekiz bin akçe üzerine inşâ-i akd-i sulh-ı şer‘î eyleyip, bedel-i sulh olan meblağ-ı mezbûr sekiz bin akçeyi yedinden bi’t-tamâm alıp kabz edip, merkūme Canfedâ’nın muhallefâtına müte‘allik da‘vâ ve talebden sagīre-i mezkûrenin zimmetini ibrâ-i küllî ile ibrâ ve iskāt eyledim dedikde, ba‘de’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâsıtı Cemâziyelevvel li sene selâsin ve erba‘în ve elf. Şuhûdü’l-hâl: Fahrü’l-akrân Ahmed Ağa el-müteferrika, Hüseyin Bey b. Hamza, Fazlullah Beşe b. Mehmed er-Râcil, İbrahim Çelebi b. Şaban, Abdi b. Ramazan, el-Hâc Salim b. Mehmed, Hüseyin b. Kasım, Mehmed b. Mehmed el-İmâm, Abdülbâkī b. Mehmed el-Müezzin, Hasan b. Ali er-Râcil, Ali b. Ahmed, Fazlullah b. Mehmed ve gayruhüm.