Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 281 Hüküm no: 305 Orijinal metin no: [62b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Subaşı b. Kurd’un kendi mülkü zannettiği eve yaptığı masrafın tesbiti Mahmiye-i İstanbul’da Davud Paşa mahallesinde mukaddemâ müteveffâ olan merhûm Selim Çelebi b. Hasan nâm râcilin ammi kızları ve zât-ı rahm cihetinden vâriseleri olan râfi‘atü’l-kitâb Saliha bt. Pîrî ve Kâmile bt. Karagöz nâm hâtunlar meclis-i şer‘-i şerîfde takrîr-i kelâm ve bast-ı merâm eyleyip, mûrisimiz müteveffâ-yı mesfûrdan bize intikāl edip mahalle-i mezbûrede vâki‘ ma‘lûmü’l-hudûd menzile mukaddemâ hâzır bi’l-meclis olan İbrahim Subaşı b. Kurd nâm kimesne mülk-i müşterâsı olmak zu‘muyla vaz‘-ı yed ve ba‘zı ebniye ihdâs eyleyip ba‘dehû biz menzil-i mezbûra da‘vâ-yı istihkāk ve isbât ve yedinden emr-i şer‘le ahz ve nez‘ eylediğimizde, ebniye-i muhdesenin mezkûr İbrahim Subaşı’ya maklû‘an kıymeti verilmek lâzım olmağın mezbûr İbrahim Subaşı bizim gaybetimizde menzil-i mezbûrun imâret ve meremmetine harc ve sarf eylediği meblağı keşf ve tahrîr ettirip bize gadr etmeğin tekrâr müdâhale-i ferde tahammülü görülüp ve ta‘yîn olunmak matlûbumdur dediklerinde, kıbel-i şer‘-i şerîfden Hüseyin Efendi b. Mehmed ve hâssa mi‘mârlardan Üstâd Musli Çelebi b. Hüsameddin irsâl olunup onlar dahi zeyl-i mastûrü’l-esâmî olan Müslimîn ile menzil-i mezkûra varıp mesfûr İbrahim Subaşı mahzarında menzil-i mezbûrun tecdîd ve ta‘mîr olunan yerlerine nazar ve mi‘mâr-ı mezkûr mesâha eyledikde, tûlen iki zirâ‘ ve kadden dört zirâ‘ hesâb-ı şatrancî üzre yirmi dört zirâ‘ şatranc duvarın her zirâ‘ına yirmişer akçeden altı yüz akçe tûlen yirmi zirâ‘ ve arzan beş zirâ‘ hesâb-ı mezkûr yüz beş zirâ‘ sakfın her zirâ‘ına yirmi beş akçeden iki bin yüz akçe ve hesâb-ı mezkûr üzre yirmi dokuz zirâ‘ tuğla duvara yirmi beşer akçeden yedi yüz yirmi beş akçe ve yüz zirâ‘ sıvanın her zirâ‘ına beş akçeden beş yüz yirmi beş akçe ve otuz yedi zirâ‘ sürh boyalı tavanın her zirâ‘ına otuz beş akçeden bin iki yüz doksan beş akçe ve yirmi dört aded tahta perdesine on beş akçeden üç yüz altmış akçe ve iki pencere demirlerine ve camlarına altı yüz akçe ve kırk aded döşeme tahtayı yirmi beş akçeden sekiz yüz akçe ve yirmi iki taş duvara kırkar akçeden sekiz yüz seksen akçe ve yirmi aded döşeme tahtasına onar akçeden dört yüz akçe ve on beş aded kestane tahtasına dörder akçeden altmış ve yirmi altı aded karadeniz tahtasına on ikişer akçeden üç yüz on iki akçe ve masdara kapıya beş yüz akçe orta kapıya iki yüz akçe ve kırk beş zirâ‘ taş duvara her zirâ‘ı otuz beş akçeden bin yüz doksan beş akçe ve zîr-i zemînin otuz zirâ‘ molozuna altmış akçeden iki bin iki yüz seksen akçe ve zîr-i zemînin malzemesine ve toprağın ihrâcına altı yüz akçe üstâdiye ve ırgādiyesiyle [63a] cem‘an on üç bin sekiz yüz otuz iki akçeye ancak tahammülü vardır deyü mi‘mâr-ı mezbûr ve sâir Müslimîn tahmîn-i sahîh ile tahmîn ettiklerinde, vâki‘ hâli müşârunileyh efendi mahallinde tahrîr ba‘dehû meclis-i şer‘de ihbâr etmeğin, mâ hüve’l-vâki‘ bi’t-taleb ketb olundu. Tahrîren fî evâsıtı Cemâziyelevvel li sene selâsin ve erba‘în ve elf. Şuhûdü’l-hâl: Osman Beşe b. Abdullah, Mehmed Beşe b. Bâli, Sinan b. Abdullah, Mehmed Bey b. Osman el-bevvâbü’s-sultânî, Ahmed Efendi b. (...), Mustafa b. Mehmed.