Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 284 Hüküm no: 308 Orijinal metin no: [63a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Abdülmennân’ın hak iddia ettiği evle ilgili olarak Mustafa Ağa b. Yusuf’a yönelik iddiasından vazgeçtiği Mahmiye-i Galata hâricinde kasaba-i Tophâne mahallâtından Mehmed Ağa mahallesinde dergâh-ı âlî -dâme mahfûfen bi’l-me‘âlî- müteferrikalarından fahrü’l-akrân Mehmed Ağa b. Abdülmennân nâm kimesne mahfil-i kazâda, bi’l-fi‘il bostancılar kethüdâsının başhasekisi olan fahrü’l-emâsil ve’l-akrân Mustafa Ağa b. Yusuf mahzarında ikrâr ve takrîr-i kelâm eyleyip mukaddemâ mahmiye-i İstanbul’da Nişancı Paşa[-yı] atîk mahallesinde vâki‘ bir tarafı İbrahim Paşa b. Abdullah mülkü ve bir tarafı Mustafa b. Ali mülkü ve bir tarafı Nikola v. Yani mülkü ile mahdûd fevkānî ve tahtânî büyût-ı müte‘addide ve bir sofa ve bi’r-i mâ ve ahırı ve eşcâr-ı müsmire ve gayr-ı müsmire hâvî hadîkayı müştemil mülk menzilimi, bundan mukaddem hâlâ Trablus Defterdârı olan Mahmud Efendi’ye bey‘-i bât ile bey‘ edip ve ba‘de’l-iştirâ semen[ini] kabz eyleyip ol dahi menzil-i mezbûru müşârunileyh Mustafa Ağa’ya bey‘-i kat‘î ile bey‘ ve teslîm ve ba‘de’l-iştirâ kabz-ı semen etmekle mülk-i mahzı olmuş iken menzil-i mezbûra da‘vâ-yı istihkāk etmiş idim, hâlâ da‘vâ-yı mezkûreden ferâğ ve müşârunileyh Mustafa Ağa’nın husûs-ı merkūma müte‘allik da‘vâ ve talebden zimmetini ibrâ-i küllî ile ibrâ eyledim dedikde, ba‘de’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâsıtı Cemâziyelevvel li sene selâsin ve erba‘în ve elf. Şuhûdü’l-hâl: Ahmed Çavuş b. Abdullah, Mustafa Efendi b. Bâli, Mehmed Çavuş b. Ali el-Mübâşir, Ahmed Bey b. Ali.