Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 288 Hüküm no: 314 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Orhan’ın Mehmed Çavuş b. Abdullah’a borcu olduğu Mahrûse-i Üsküdar’da vâki‘ hâlâ kāimmakām-ı sadâret-i a‘zam olan vezîr-i âlî-kadr âsaf-nişân Bayram Paşa -ve nassarallâhu te‘âlâ mâ yürîd ve mâ yeşâ- hazretlerinin bağçelerinde sâkin olan umdetü’l-emâcid ve’l-a‘yân ve Orhan b. ( ) nâm kimesne tarafından husûs-ı âti’l-beyâna vekîli olup hasm-ı münkir-i şer‘î mahzarında kal‘a-i Kars ahâlîsinden el-Hâc Hüsrev b. Abdullah ve medîne-i Van ahâlîsinden Kâtib Osman b. Hüseyin şehâdetleri ile vekâleti sâbite olan fahrü’l-akrân Ramazan Ağa b. Receb nâm kimesne meclis-i şer‘-i şerîfde, mahmiye-i İstanbul’da Hoşkadem mahallesinde sâkin dergâh-ı âlî -dâme mahfûfen bi’l-me‘âlî- çavuşlarından râfi‘ü’l-kitâb Mehmed Çavuş b. Abdullah nâm kimesne mahzarında ikrâr ve takrîr-i kelâm eyleyip, mesfûr Mehmed Çavuş’un mâl-ı hâlisinden müvekkil-i müşârunileyh ve Orhan zimmetinde deyn-i şer‘î vechi üzre üç bin altı yüz aded riyâlî guruş ve bir vaşak nâfesi kürk semeninden iki bin dört yüz aded riyâlî guruş ve bir samur kürk semeninden iki bin aded riyâlî guruş cem‘an sekiz bin aded mezkûru’l-vasf guruş hakkı olup, meblağ-ı mezbûrun cümlesi târih-i kitâbdan yüz yirmi gün tamâmına mev‘ûd ve müecceldir ve meblağ-ı mezbûr sekiz bin aded riyâlî guruş mukābelesinde müvekkil-i müşârunileyh ve Orhan’ın silk-i mülk-i sahîhinde olan eşyâdan sîm zincir ve palan ve bâzûbendiyle üç yüz guruş kıymetli bir sîm raht ve beş bâftesi nâkıs yüz elli guruş kıymetli bir altın raht ve yüz elli guruş kıymetli bir sîm leğen ve ibrik ve otuz guruş kıymetli bir topuz ve seksen guruş kıymetli bir çift sîm rikâb ve yüz altmış guruş kıymetli bir sîm eyer ve kırk guruş kıymetli baratasıyla bir bir abayı ve cümlesi yüz elli guruş kıymetli bir sırmalı yorgan ve bir seccâde ve iki sofra ve bir yasdık ve yüz yirmi guruş kıymetli üç aded hil‘at ve dört yüz guruş kıymetli samur kürklü bir hil‘at ve iki yüz elli guruş kıymetli samur kürklü bir diğer hil‘at ve beş yüz guruş kıymetli acem tarzı bir samur kürk ve üç yüz guruş kıymetli diğer tarz-ı acem bir samur kürk ve beş yüz guruş kıymetli altın düğmeli samur kaplı sürh kıt‘a kapaniçe ve otuz guruş kıymetli bir murassa‘ nemekdân ve yetmiş guruş kıymetli otuz sekiz miskāl bir altın tas müşârunileyh Mehmed Çavuş yedinden rihân-ı makbûze vaz‘ ve teslîm olunmuşdur dedikde, vekîl-i mesfûru ikrâr-ı meşrûhunda dâyin-i mezkûr Mehmed Çavuş vicâhen tasdîk etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min Cemâziyelevvel li sene selâsin ve erba‘în ve elf. Şuhûdü’l-hâl: Umdetü’l-a‘yân Mustafa Ağa b. el-vezîr-i mükerrem Mehmed Paşa, es-Seyyid İbrahim b. es-Seyyid ( ), Nasrullah Çelebi b. el-Hüseyn el-Halebî, Mehmed Ağa b. ( ) mine’l-müteferrika sâkin-i Sultantepesi, Ali Ağa b. Behrâm, Mustafa Ağa b. ( ) el-bevvâbü’s-sultânî, Mehmed Çavuş b. el-Hâc Mirza, Ali Efendi b. Hamza el-İmâm bi bâb-ı Eski odalar, Mustafa Bey b. Abdullah el-Yesârî, Abbas Çelebi b. Seyfi bezzâzistân kapısında, Seyyid Mehmed Çavuş der Emîr Buhârî, Sireddin Çelebi el-Halebî, Osman Çelebi b. Mansur sâkin-i Behrâm mahallesi, Veli b. Davud, Abdülkerim Çelebi b. ( ) Pîrî Paşa hânında, el-Hâc Kenan b. Abdullah, el-Hâc İbrahim Çelebi der hân-ı Pîrî Paşa, Ahmed Çavuş b. el-Hâc Abbas, el-Hâc Rıdvan b. Satılmış Karamânî, el-Hâc Murad b. ( ) tâbi‘-i Osman Ağa.