Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 45 Hüküm no: 7 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zador v. Minas’ın Karagöz v. Bedros ile arsasını değiştirdiği Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Ahmed Efendi b. Abdülbâkī Efendi irsâl olunup ol dahi mahmiye-i İstanbul’da Kumkapı kurbunda Süleyman Ağa mahallesinde sâkin Zador v. Minas nâm Ermeni zimmînin menziline varıp zeyl-i kitâbda mastûrü’l-esâmî müslimîn huzûrunda akd-i meclis eyledikde, merkūm Zador meclis-i mezbûrda kendiye muttasıl menzilde sâkin Karagöz v. Bedros nâm Ermeni zimmî muvâcehesinde tav‘an ikrâr ve i‘tirâf edip bir tarafı Kürkçübaşı Vakfı’ndan olup Serkis nâm Ermeni tasarrufunda olan menzile ve bir tarafı Osman Ağa mülküne ve bir tarafı ba‘zan merkūm Karagöz ve ba‘zan yine Osman Ağa mülküne ve bir tarafı merkūm Karagöz mülküne müntehî hâlâ içinde sâkin olduğum cemî‘ mülk menzilimin merkūm Karagöz tarafından iştirâken devr eylediğimiz sokak kapısı dâhilinde vâki‘ tûlen ve arzan terbî‘î on dört zirâ‘ arsa-i hâliyem ve mârrü’z-zikr arsa kurbunda merkūm Serkis tasarrufunda olan vakıf menzil tarafında dahi tûlen ve arzan bi hesâb-ı terbî‘î dört buçuk zirâ‘ arsa-i hâliyem ile ve üç yüz cedîd akçe ile merkūm Karagöz’ün mülkü olup benim tarafımda vâki‘ tûlen ve arzan bi hesâb-ı terbî‘î kırk sekiz zirâ‘ arsa-i hâliyesi ile mübâdele-i sahîha-i şer‘iyye ile mübâdele edip merkūm Karagöz zikr olunan arsayı ve meblağ-ı mezbûr üç yüz akçeyi yedimden ahz ve tesellüm edip ben dahi mârrü’z-zikr kırk sekiz zirâ‘ arsayı kabûl ve tesellüm eylediğimden sonra tûlen ve arzan bi hesâb-ı terbî‘î yirmi altı zirâ‘ mârrü’z-zikr iştirâken devr eylediğimiz sokak kapısı fevkinde müceddeden bir bâb oda binâsına merkūm Karagöz’e izn-i sarîh ile izin verdim dedikde, mukırr-ı mezbûru ikrâr-ı meşrûhunda el-mukarru lehü’l-merkūm vicâhen tasdîk ve şifâhen tahkīk eylediğini mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin, mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilevvel li sene 1059. Şuhûdü’l-hâl: Mustafa Efendi bin Davud el-imâm, Halil Halîfe b. Musa el-müezzin, Hasan Dede bin Halil.