Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 44 Hüküm no: 6 Orijinal metin no: [2a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Mustafa’nın bıçakçı dükkânı kirası davasında İsmail b. Mehmed ile sulh olduğu Mahmiye-i İstanbul’da Mi‘mâr Ayas mahallesinde sâkin Hasan Bey b. Mustafa meclis-i şer‘-i hatîrde, mahalle-i mezbûrede sâkin işbu râfi‘ül-kitâb İsmail b. Mehmed mahzarında bi’t-tav‘i’s-sâf ikrâr ve i‘tirâf edip merhûm Hürrem Çavuş Vakfı’ndan olup beher mâh vakf-ı mezbûra yirmi akçe icâre-i müeccelesi olan Şehzâde sûkunda vâki‘ lede’l-ahâlî ma‘lûmü’l-hudûd bir bâb bıçakçı dükkânının ma‘rifet-i mütevellî-i vakf-ı mezbûr ile dört sehimden bir sehimi benim tasarrufumda ve üç sehimi dahi mezkûr İsmail’in tasarrufunda olup lâkin mezbûr İsmail sâlifü’z-zikr cemî‘ dükkâna on beş sene tasarruf edip hâsıl olan cemî‘ icâresini ahz u kabz eylemekle, ben dahi icâre-i mezbûreden hisse-i şer‘iyyemi merkūm İsmail’den taleb ve da‘vâ eylediğimde bana edâ ve teslîmden ta‘annüd etmekle, beynimizde münâza‘ât-ı kesîre vâkı‘a olmuşdu. El-hâletü hâzihî beynimizde muslihûn tavassut edip da‘vâ-yı mezbûremden beni mezbûr İsmail ile dört kıt‘a riyâlî kuruş üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr dört kıt‘a riyâlî kuruşu meclis-i sulhda merkūm İsmail yedinden ahz u kabz edip zikr olunan icâre da‘vâsından berî olup husûs-ı mezbûra müte‘allika âmme-i da‘vâdan mezbûr İsmail’in zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde, mukırr-ı mezbûru ikrâr-ı meşrûhunda el-mukarru lehü’l-mezbûr İsmail vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilevvel sene 1059. Şuhûdü’l-hâl: Ahmed Çelebi b. Abdülbâkī Efendi, Receb b. Mehmed, İbrahim b. Musa, Hüseyin b. Mustafa, Mehmed Çelebi b. ( ).