Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 51 Hüküm no: 16 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdülmennân ile karısının ev hisselerinin satışı hususundaki anlaşmaları Mahmiye-i İstanbul’da Ahmed Ağa mahallesinde sâkin Dergâh-ı âlî müteferrikalarından Yaralı demekle ma‘rûf fahrü’l-akrân Ahmed b. Abdülmennân meclis-i şer‘-i hatîr-i lâzımü’t-tevkīrde, kendi tarafından asâleten ve halîle-i celîlesi Hatice Hâtun bt. Sırmakeş Mahmud Ağa tarafından şirâ-i âti’l-beyâna vekîl olup vekâleti mezbûreyi ma‘rifet-i şer‘iyye ile ârifân olan Mehmed Çelebi b. Ali ve Hüseyin Dede b. Yusuf şehâdetleriyle şer‘an sâbite olan işbu sâhibü’l-kitâb zahrü’l-emâsil ve’l-akrân Mustafa Ağa b. Süleyman mahzarında tav‘an ikrâr ve i‘tirâf edip işbu akdin sudûruna değin silk-i yedimde münselik mülküm ve taht-ı tasarrufumda hakkım olup mahalle-i mezbûrede vâki‘ bir tarafı Sekban Ali Çelebi kızı Fâtıma Hâtun mülküne ve etrâf-ı selâsesi tarîk-i âmma müntehî muhavvata-i hâriciyesi fevkānî üç bâb oda ve kenîfi ve tahtında ahûru ve bir su kuyusunu ve anbarı ve musluğu ve muhavvata-i dâhiliyesi fevkānî bir büyük ocaklı oda ve bir sofa ve bir köşk ve kenîfi ve tahtânî iki büyük ocaklı odayı ve iki sofayı ve bir kurnalı hamamı ve camekânı ve külhanı ve dehlizi ve matbahı ve mahtabı ve mahzeni ve bir su kuyusunu ve cüneyneyi ve kenîfi müştemil cemî‘ menzilin hakk-ı şâyi‘ini, kâffe-i hukūk ve merâfıkıyla mezbûr Mustafa Ağa’ya iki bin yüz elli riyâlî kuruşa tarafeynden îcâb ve kabûlü hâvî şürût-ı müfsideden ârî bey‘-i bâtla bey‘ ve teslîm eyledim, ol dahi nefsi için iştirâ ve tesellüm eylediğinden sonra menzil-i mezkûr nısf-ı şâyi‘-i âharını dahi kâffe-i hukūk ve merâfıkı ile merkūm Mustafa Ağa’ya altı yüz elli riyâlî kuruşa müvekkilesi mezbûre Hatice Hâtun’un babası mezbûr Sırmakeş Mahmud Ağa’dan irs-i şer‘î ile intikāl edip yedinde ve taht-ı tasarrufunda mülk ve hakkı olup mahmiye-i mezbûrede Haydarhâne mahallesinde vâki‘ bir tarafı mâliye tezkirecisi Kadızâde Mehmed Efendi mülküne ve bir tarafı Kara Çelebizâde demekle şehîr a‘lemü’l-ulemâ’i’l-izâm efdalü’l-fuzalâ’i’l-fihâm Mahmud Efendi mülküne ve bir tarafı Sırmakeş Mahmud Ağa veresesi mülklerine ve bir tarafı tarîk-i âmma muttasıl muhavvata-i dâhiliyede fevkānî bir odayı ve matbahı ve üzerinde bir odayı ve kenîfi ve havluyu ve muhavvata-i hâriciyede fevkānî bir bâb odayı ve sofayı ve mahzeni müştemil cemî‘ menzili ile bi cümleti’l-hudûd ve’l-hukūk ve’l-merâfık tarafeynden îcâb ve kabûlü hâvî bey‘-i mukāyaza ile bâtten bey‘ ve teslîm eyledim. Mezkûr Mustafa Ağa dahi müvekkilesi merkūme Hatice Hâtun için iştirâ ve tesellüm edip meclis-i akidde ol dahi zikr olunan Haydarhâne mahallesinde olan cemî‘ menzili ve altı yüz elli riyâlî kuruşu cem‘an iki bin sekiz yüz riyâlî kuruşu el-addü’s-sahîh bi’t-tamâm bana vekâleten ve asâleten def‘ ve teslîm edip ben dahi cemî‘ menzil-i mezbûr ve cemî‘ meblağ-ı mezbûru tamâmen tesellüm ve ahz u kabz eyledim. Min ba‘d zikr olunan Ahmed [Ağa] mahallesinde bey‘ eylediğim cemî‘ menzilin nısf-ı şâyi‘i mezbûr Mustafa Ağa’nın mülk-i müşterâsı ve hakk-ı sırfıdır ve nısf-ı şâyi‘-i âharı dahi müvekkilesi mezbûre Hatice Hâtun’un mülk-i müşterâsı ve hakk-ı sırfıdır dedikde, vekîl-i merkūm Mustafa Ağa dahi zikr olunan Haydarhâne mahallesinde olan cemî‘ menzil-i mezbûr vech-i meşrûh üzre olan akd mûcebince merkūm Ahmed Ağa’nın mülk-i müşterâsı ve hakk-ı sırfıdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Fahrü’l-akrân Kazzâz Mehmed Ağa b. Abdülmennân, Ahmed Ağa b. İsmail, Bostan Ağa b. Mehmed, Abdurrahman Bey b. Mustafa, Hüseyin Dede, Şeyh Abdülkerim b. eş-Şeyh Vâlidi’l-enâm?, Osman Halîfe b. Fazlullah el-kayyum, Süleyman Bey b. Abdullah el-bevvâbü’s-Sultânî, el-Hâc Rıdvan b. Abdullah, Ahmed Çelebi b. Yusuf, Yusuf Beşe b. Hüseyin Bey el-yesârî, Ali Çelebi b. Ali, Ali Efendi b. Halil el-imâm.