Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 51 Hüküm no: 15 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakkas b. Mehmed’in Çirmen Sancakbeyi Mustafa Bey’deki alacak iddiasını ispat edemediği Vilâyet-i Rumeli’nde Zağra-i Cedîd kazâsına tâbi‘ Muharrembey Çiftliği’nde sâkin Vakkas b. Mehmed nâm kimesne meclis-i şer‘-i hatîr-i lâzımü’t-tevkīrde, sâbıkan Çirmen Sancağı’na mutasarrıf olan Mustafa Bey b. Davud Paşa mahzarında üzerine nakdiyye da‘vâ edip işbu Mustafa Bey bundan akdem zikr olunan sancağa mutasarrıf iken benim iki öküzüm serika olundu senin öküzün serika olunmuş deyû beni ahz ve habs edip nâ-hak yedimden iki bin altı yüz fıddî-i cedîd akçemi ahz eylemişdir, hâlâ suâl olunup meblağ-ı mezbûrun alıverilmesini taleb ederim dedikde, gıbbe’s-suâl mezbûr Mustafa Bey husûs-ı mezbûreyi bi’l-külliye inkâr edicek, müdde‘î-i mezbûreden da‘vâsını mübeyyine beyyine taleb olundukda ityân-ı beyyineden izhâr-ı acz eyleyip istihlâf etmeğin, merkūm Mustafa Bey’e minvâl-i muharrer üzre müdde‘î-i mezbûrun nâ-hak iki bin altı yüz akçesini ahz u kabz edip bu vechile müdde‘î-i mezbûrun zimmetinde hakkı olmadığına yemîn teklîf olundukda hasbe’l-mes’ûl yemîn billâhi etmeğin, mâ hüve’l-vâki‘ bi’t-taleb ketb olundu. Hurrire fi’l-yevm ( ) [min] şehri Rebî‘[ilevvel] li sene tis‘a ve hamsîn ve elf. Şuhûdü’l-hâl: Hüseyin Çavuş b. İlyas, Mustafa Çelebi b. Mehmed, İsa Bey [b.] Ahmed, Yahya Bey [b.] Zekeriya.