Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 53 Hüküm no: 18 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine ve Mümine’nin tasarruflarında olan vakıf menzilin vasîleri tarafından Mehmed Ağa b. Hüseyin Ağa’ya ferâğı Mahmiye-i İstanbul’da Hoca Rüstem mahallesinde sâkin [iken] vefât eden Durak ( ) nâm kimesnenin sulbiye sagīre kızları Emine ve Mümine’nin tesviye-i umûrlarına hâkim-i muvakki‘-i kitâb tûbâ-lehû ve hüsnü me’âb vasî nasb edip vesâyeti kabûl eden Mustafa b. ( ) meclis-i şer‘-i hatîr-i lâzımü’t-tevkīrde, hâlâ sadr-ı a‘zam-ı bedr-i efham hazretlerinin kethüdâları olan umdetü’l-emâcid ve’l-ekârim câmi‘u’l-mehâmid ve’l-ekârim zü’l-kadri’r-refî‘ ve’l … menî‘ Mehmed b. Hüseyin Ağa tarafından tasdîk-i âti’l-beyâna vekîl olup vekâleti bi mâ hüve nehcü’s-sübût şer‘an sâbite olan Süleyman Halîfe b. Yusuf el-müezzin mahzarında bi’l-vesâye tav‘an ikrâr ve i‘tirâf edip mahalle-i mezkûrde vâki‘ Hoca Ferhad Mescidi’nin imâm ve müezzinine gallesi meşrûta olup mahalle-i mezkûrede vâki‘ bir tarafı Kenan bin Abdullah tasarrufunda olan vakıf menzile ve bir tarafı Emine bt. ( ) tasarrufunda olan vakıf menzile ve bir tarafı müşârun-ileyh Mehmed Ağa mülküne ve bir tarafı tarîk-i âmma müntehî bir bâb fevkānî odayı ve sofayı müştemil olan vakıf menzil icâre-i mu‘accele ve yevmî bir akçe icâre-i müeccele ile müteveffâ-yı mezbûr Durak’ın tasarrufunda olup ba‘de vefâtihî intikāl-i âdî ile sagīretân-ı mezbûretân Emine ve Mümine’ye intikāl edip vesâyetim hasebiyle yedimde olup lâkin sagīretân-ı mezbûretânın nafaka ve kisvelerine ism-i mâl ıtlâk olunur şeyleri olmayıp, zikr olunan bedel-i misli ile âhara tefvîz olunması lâzım gelmeğin, sûk-ı sultânîde müzâyede olunup mûmâ-ileyh Mehmed Ağa üzerinde iki yüz riyâlî kuruş karâr edip ziyâde ile taleb-i âhar olmamağla, ben dahi sagīretân-ı mezbûretânın zarûret-i nafakaları için zikr olunan cemî‘ menzili kâffe-i hukūk ve merâfıkı ile mûmâ-ileyh Mehmed Ağa’ya iki yüz riyâlî kuruş mukābelesinde mütevellî-i vakf-ı mezbûr ma‘rifetiyle bi’l-vesâye ferâğ ve tefvîz ve teslîm eyledim, ol dahi nefsi için tefevvüz ve tesellüm ve kabûl edip bedel-i ferâğ-ı mezkûr iki yüz riyâlî kuruşu bana def‘ ve teslîm edip ben dahi vesâyeten tamâmen sagīretân-ı mezbûretân için ahz u kabz ve istîfâ eyledim dedikde, vasiyy-i mezbûr Mustafa’nın vech-i muharrer üzre cârî ve sâdır olan ikrârını vekîl-i mezkûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fî gurreti şehri Rebî‘ilâhir li sene tis‘a ve hamsîn ve elf. Şuhûdü’l-hâl: Mustafa Efendi b. Süleyman el-imâm, Ahmed Beşe b. Mahmud, Mehmed b. Menteş, Kenan b. Abdullah, Mustafa Bey b. Abdi, Ahmed Ağa b. Mehmed, Abdurrahman b. Atâullâh, Mehmed Bey b. Ali el-cündî, Kaytas Çavuş b. Abdi.