Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 54 Hüküm no: 19 Orijinal metin no: [5b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Alof ve Yasef adlı iki yahudinin kendilerine borçlu olarak ölen İngiliz tüccarı Tomas’ın kefiliyle anlaştıkları Mahmiye-i İstanbul’da Frenk mahallesi sükkânından Portakal cemâ‘atinden Alof ve Kalon? cemâ‘atinden Yasef Perinka v. Salamon nâm Yahudiler meclis-i şer‘-i şerîfde, İngiliz müste’menlerinden işbu râfi‘ül-kitâb Martin v. Anvens nâm müste’men mahzarında her [biri] tav‘an ikrâr ve takrîr-i kelâm edip İngiliz müste’menlerinden olup bundan akdem mahrûse-i Galata’da Bereketzâde mahallesinde sâkin iken hâlik olan Tomaro v. Bartley nâm müste’men ülkemizden hâl-i [hayâtında] ve nefâz-ı tasarrufâtında ikrâzımız ile iktirâz ve kabz eylediği bin iki yüz altmış bir riyâlî kuruş mukābelesinde, yedinde mülk ve hakkı olan yüz elli zirâ‘ tilki hâre ile beş yüz zirâ‘ çatma? kadifesini yedimize rehin vaz‘ ve teslîm edip biz dahi minvâl-i meşrûh üzre irtihân ve tesellüm ve kabûl eyledikden sonra mezbûr Martin dahi meblağ-ı mezbûr[a] tarafeynden emr ve kabûlü hâviye kefâlet-i sahîha-i şer‘iyye ile kefîl olup ba‘dehû meblağ-ı mezbûru kable’l-îfâ mezbûr Tomaro hâlik olmağın, meblağ-ı mezbûr hakkımız [olan] bin iki yüz altmış bir riyâlî kuruşu kıbel-i şer‘den mansûb vasîsi muvâcehesinde huzûr-ı hâkimde beyyine-i âdile ile isbât edip ba‘de’l-hükm rihân-ı mezbûreden istîfâ eyledik, min ba‘d kefîl-i merkūm Martin zimmetinde bi hükmi’l-kefâle bir akçe ve bir habbe hakkımız kalmayıp meblağ-ı mezbûr bin iki yüz altmış bir riyâlî kuruşdan zimmeti berî olup olmuşdu[r] dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Mustafa b. Mehmed, İbrahim Çavuş, Ebûbekir Beşe b. Mustafa çukadâr, İsa b. Ahmed.