Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 60 Hüküm no: 26 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Pîrî Çavuş’un menzil hissesini kardeşi Fahri Hâtun’un menzili ile takas ettiği Mahmiye-i İstanbul’da Sinan Paşa mahallesinde sâkin iken vefât eden Ahmed Çavuş nâm kimesnenin verâseti sulbî oğulları Pîrî Çavuş ve İbrahim Çavuş ve sulbiye kızları Ayşe ve Hatice nâm hâtunlara münhasıra olup kable’l-kısme merkūme Hatice Hâtun dahi vefât edip verâseti li ebeveyn karındaşı mezbûr Pîrî Çavuş ve İbrahim Çavuş’a [ve] li ebeveyn kız karındaşı merkūme Ayşe Hâtun’a münhasıra olup kable’l-kısme merkūm Pîrî Çavuş dahi vefât edip verâseti zevce-i metrûkesi Fâtıma Hâtun bt. Ali’ye ve sulbiye kızları Fahri ve Râbia’ya ve li ebeveyn kız karındaşı merkūme Ayşe’ye münhasıra olup tereke-i müteveffâ-yı evvel üç yüz altmış sehim i‘tibâr olunup sihâm-ı mezbûreden doksan beş sehimi mezbûre Fahri’ye ve doksan beş sehimi merkūme Râbia’ya ve yüz yetmiş beş sehimi mezbûre Ayşe’ye isâbet eylediği şer‘an mütehakkık oldukdan sonra mezbûre Râbia Hâtun’un zevci ve tarafından husûs-ı âti’l-beyâna vekîli olup vekâleti mezbûreyi ma‘rifet-i şer‘iyye ile ârifeyn olan Ali Bey b. İbrahim ve Yusuf Bey b. Abdi şehâdetleri ile şer‘an sâbite olan Mustafa Halîfe b. Mehmed Bey meclis-i şer‘-i hatîrde, mezbûre Fahri Hâtun’un dahi zevci ve tarafından husûs-ı âti’l-beyâna vekîli olup vekâleti mezbûreyi ma‘rifet-i [şer‘iyye] ile ârifeyn olan Ali Çelebi b. Mustafa ve Veli Bey b. Yusuf şehâdetleri ile şer‘an sâbite olan umdetü’l-a‘yân Rıdvan Ağa b. Abdullah mahzarında bi’l-vekâle ikrâr ve i‘tirâf edip müteveffâ-yı evvel Ahmed Çavuş’un terekesinden olup mahalle-i mezbûrede vâki‘ bir tarafı tarîk ve bir tarafı tarîk-i hâssa ve bir tarafı mezbûr Ali Çelebi mülküne ve bir tarafı Solakbaşı evi demekle ma‘rûf vakıf menzile muttasıl olan cemî‘ menzilden müvekkilem [ 7b ] mezbûre Râbia Hâtun bi hasebi’l-münâsahati’l-mezkûre kendiye isâbet eden doksan beş sehm-i şâyi‘ hisse-i şer‘îsi mukābelesinde mezbûre Fahri Hâtun ile yine mezbûr hâtun yedinde ve taht-ı tasarrufunda mülkü ve hakkı olup mahmiye-i mezbûrede Defterdâr Ahmed Çelebi mahallesinde vâki‘ bir tarafı Mahmud Efendi b. Mustafa tasarrufunda olan menzile ve bir tarafı İsmail b. İbrahim tasarrufunda olan menzile ve bir tarafı Mehmed Ağa b. ( ) nâm cündî mülküne ve bir tarafı tarîk-i hâssa müntehî muhavvata-i dâhiliyesi iki bâb fevkānî odayı ve bir büyük sofayı ve iki sagīr sofayı ve bir koltuk odayı ve iki tahtânî odayı ve bir hamamı ve bir matbahı ve bi’r-i mâyı ve zât-ı eşcâr hadîka ve kenîfi ve muhavvata-i hâriciyesi bir fevkānî odayı ve sofa ve ahûru ve kenîfi müştemil cemî‘ menzili, kâffe-i hukūk ve merâfıkı ile mukābele-i hisse-i sahîha-i şer‘iyye ile mukāyaza ve mübâdele edip ve müvekkile-i mezbûre Râbia Hâtun menzil-i evvelde minvâl-i meşrûh üzre olan üç yüz altmış sehimden doksan beş sehm-i şâyi‘ini müvekkile-i mezbûre Fahri Hâtun’a teslîm edip mezbûre Fahri Hâtun dahi tesellüm-i şer‘î ile tesellüm edip yedinde olup Defterdâr Ahmed Çelebi mahallesinde hudûd-ı mezkûre ile mahdûd menzil-i mezbûru cemî‘ hukūk ve merâfıkı ile mezbûre Râbia Hâtun’a teslîm edip ol dahi tesellüm edip mezbûr Sinan Paşa mahallesinde hudûd-ı mezkûr ile mahdûd olan menzilde minvâl-i meşrûh üzre olan doksan beş sehm-i şâyi‘i müvekkile-i mezbûre Fahri Hâtun’un mülk ve hakkıdır ve Defterdâr Ahmed Çelebi mahallesinde hudûd-ı mezkûr ile mahdûd olan cemî‘ menzil-i mezkûr müvekkile-i mezkûre Râbia Hâtun’un mülk ve hakkıdır dedikde, vekîl-i mezbûr Mustafa Çelebi’yi ikrâr-ı meşrûhunda vekîl-i mezbûr Rıdvan Ağa vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’s-sâmin min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Ali Bey b. Abdi, Ali Çelebi b. Rüstem, Hacı Mustafa b. ( ), Takyeci İsmail Çelebi b. ( ), Hüseyin Çelebi b. Hamza el-imâm.