Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 59 Hüküm no: 25 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye Hâtun bt. Mustafa Ağa’nın menzilini Yeniçeri Kethüdası Mustafa Ağa b. Sefer’e sattığı Mahmiye-i İstanbul’da Kızıltaş mahallesinde sâkine fahrü’l-muhadderât Raziye Hâtun bt. Mustafa Ağa tarafından bey‘-i âti’l-beyâna ve kabz-ı semene vekîl olup vekâleti mezbûreyi ma‘rifet-i şer‘iyye ile ârifân olan zevci Hasan Ağa b. Ahmed ve Hüseyin Bey b. Ali şehâdeti ile şer‘an sâbite olan babası mûmâ-ileyh Mustafa Ağa meclis-i şer‘de, sâbıkan yeniçeriler kethüdâsı olan umdetü’l-emâcid ve’l-ekârim câmi‘u’l-mehâmid ve’l-mekârim Mustafa Ağa b. Sefer tarafından dahi ikrâr-ı âti’l-beyânı tasdîka vekîl bi mâ hüve nehcü’s-sübût şer‘an sâbite olan Şaban Odabaşı b. Mehmed mahzarında bi’l-vekâle tav‘an ikrâr ve i‘tirâf edip zikri âtî akdin sudûruna değin kızım ve müvekkilem mezbûrenin silk-i mülkünde münselik ve hakkı olup mahmiye-i mezbûrede Hâfız Mustafa Çelebi mahallesinde vâki‘ bir tarafı Mirza Çelebi b. ( ) mülküne ve bir tarafı Yenibahçe çayırına ve bir tarafı merhûm Koca Mehmed Paşazâde İbrahim Hân oğlu Ahmed Bey bostanına ve bir tarafı tarîk-i âmma müntehî olup üç bâb fevkānî odayı ve üç sofayı ve bir köşkü ve iki bâb tahtânî odayı ve matbahı ve üç su kuyusunu ve havluyu ve eşcâr-ı müsmire ve gayr-ı müsmire bahçeyi müştemil cemî‘ mülk menzilini, cemî‘ tevâbi‘ ve levâhıkı ve kâffe-i hukūk ve merâfıkı ile bi hükmi’l-vekâle müvekkil-i mûmâ-ileyh Mustafa Ağa’ya dört bin kıt‘a riyâlî kuruşa bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm ve kabûl eyledikden sonra semen-i mezbûr dört bin riyâlî kuruşu müvekkil-i müşârun-ileyh bana def‘ ve teslîm edip ben dahi bi’l-vekâle yedinden ahz ve tesellüm eyledim. Ba‘de’l-yevm sâlifü’z-zikr menzil müvekkil-i mûmâ-ileyhin mülk-i müşterâsıdır, keyfe mâ yeşâ mutasarrıf olsun dedikde, mukırr-ı mezbûrun vekâleten cârî ve sâdır olan ikrârını vekîl-i mezbûr Şaban Odabaşı vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fî selhi şehri Rebî‘ilevvel li sene tis‘a ve hamsîn ve elf. Şuhûdü’l-hâl: Süleyman Subaşı [Bölü]k 35, Yusuf Subaşı b. Abdurrahman, Ali Beşe b. Mehmed er-râcil, Süleyman Subaşı [Bölü]k 37, Mehmed Beşe b. Receb, Halil Beşe b. Ahmed, Hüseyin Beşe b. Mehmed, Yusuf Yazıcı b. Abdullah, Mahmud Beşe b. Receb.