Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 67 Hüküm no: 35 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sunullah Çelebi b. İbrahim’in Mustafa Ağa b. Piyâle’nin vârislerinden alacağını tahsil ettiği Mahmiye-i İstanbul’da Uzun Yusuf mahallesinde sâkin Sunullah Çelebi b. İbrahim nâm kimesne meclis-i şer‘-i şerîfde, mahmiye-i mezbûrede Sofular mahallesinde sâkin iken vefât eden Mustafa Ağa b. Piyâle’nin zevi’l-erhâm cihetinden vârisleri ve muhallefâtına vaz‘-ı yed ettikleri şer‘an mütehakkık olan li ebeveyn halası kızının oğlu Mehmed Çelebi b. Şeyh Mehmed ve diğer li ebeveyn halasının oğlu kızı Sâyime Hâtun bt. Musli tarafından ikrâr-ı âti’l-beyânı tasdîka sâbitü’l-vekâle vekîl olan Ahmed Çelebi b. Mehmed nâm kimesneler mahzarlarında tav‘an ikrâr ve takrîr-i kelâm edip mezbûr Mustafa Ağa zimmetinde cihet-i karz-ı şer‘îden otuz bin cedîd râyic fi’l-vakt akçe hakkım olup kable’l-îfâ vefât edip meblağ-ı mezbûr zimmetinde kalmağın meblağ-ı mezbûru bundan akdem muhallefâtından taleb eylediğimde, ba‘de’l-inkâr beyyine-i âdile ile huzûr-ı hâkimde vârisân-ı mezbûrân muvâcehesinde isbât edip terekesinden meblağ-ı merkūmun edâsına hükm olunmuşdu. Hâlâ meblağ-ı mezbûr otuz bin akçe hakkımı mezbûrân Mehmed Çelebi ve Sâyime Hâtun’un yedlerinden tamâmen alıp kabz eyledim. Min ba‘d meblağ-ı mezbûrdan bir akçe ve bir habbe hakkım bâkī kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Zilhicceti’ş-şerîfe li sene 1058. Şuhûdü’l-hâl: Mehmed b. Mustafa, Sefer b. Mustafa, Kenan b. Abdullah, Yahya Bey b. Zekeriya.