Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 67 Hüküm no: 34 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Mehmed’in alacak hususunda Abdülkerim Bey b. Mustafa ile sulh olduğu Hadâyik-i sultâniyeden Hasbahçe bostancılarından İbrahim b. Mehmed nâm kimesne meclis-i şer‘-i şerîfde, mahmiye-i İstanbul’da Çerağī Hamza mahallesinde sâkin işbu râfi‘ül-kitâb Abdülkerim Bey b. Mustafa nâm kimesne mahzarında tav‘an ikrâr ve takrîr-i kelâm edip vilâyet-i Anadolu’da Sığacık Sancağı’nda Ezine kazâsında vâki‘ düstûr-ı mükerrem ve müşîr-i müfahham Kapudân Ahmed Paşa hâssı olan Büklü mukāta‘ası bin elli yedi ve bin elli sekiz senelerinde beher sene seksen bin râyic fi’l-vakt akçeye mezbûr Abdülkerim Bey ile ale’l-iştirâki’s-seviyy taht-ı iltizâmımızda olup her senede cem‘ eylediğimiz mahsûlün kıymet-i şer‘iyyesi kapudân-ı mûmâ-ileyhe edâ ve îfâ eyledikden sonra mukāta‘a-i mezbûre mahsûlünden benim hisseme ve hakkım olan on bin akçeyi Kesekci Ali Dede yediyle ve fürûht eylediği buğday semeninden elli sekiz buçuk riyâlî kuruşumu cem‘an on bin cedîd akçe ile elli sekiz buçuk riyâlî kuruş hakkımı ahz u kabz ve kendi mesârifine sarfla istihlâk etmeğin, zikr olunan on bin cedîd akçe ile elli sekiz buçuk riyâlî kuruş hakkımı mezbûr Abdülkerim Bey’den da‘vâ ve taleb eylediğimde vermede ta‘annüd edip inkâr etmekle, beynimizde münâza‘ât-ı kesîre vâkı‘a olmuşdu. El-hâletü hâzihî beynimize muslihûn tavassut edip meblağayn-i mezbûreyn da‘vâsından beni mezbûr Abdülkerim Bey ile üç bin cedîd râyic fi’l-vakt akçe üzerine inşâ-i akd-i sulh eylediklerinde, ben dahi sulh-ı mezbûru kabûl ve bedel-i sulh olan üç bin akçeyi merkūm Abdülkerim Bey’in yedinden tamâmen alıp kabz edip meblağayn-i mezbûreyn da‘vâsından ve târih-i kitâba gelince cemî‘ da‘vâdan mezbûr Abdülkerim Bey’in zimmetini ibrâ eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilevvel sene 1059. Şuhûdü’l-hâl: Receb Efendi b. ( ) imâm, Musa b. Veli, Salih b. Kurd, Sefer Çavuş b. Abdullah, Ali Ağa.