Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 68 Hüküm no: 37 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. Bayram’ın idam edilen Varvar Ali Paşa’daki alacağının terekesinden ödenmesi Husûs-ı âti’l-beyânın mahallinde istimâ‘ı lâzım gelmekle, bi’l-iltimâs hâkim-i muvakki‘-i kitâb tûbâ-lehû ve hüsnü me’âb dahi mahmiye-i İstanbul’da Emin Nureddin mahallesinde hâlâ çavuşbaşı olan umdetü’l-emâcid ve’l-ekârim Abdülfettâh Ağa çavuşbaşılık için ittihâz eylediği menzile varıp akd-i meclis-i şer‘-i şerîf eyledikde, merhûm Şaban Paşa etbâ‘larından Hüseyin Bey b. Bayram meclis-i ma‘kūdda, bundan akdem eyâlet-i Rum’dan ma‘zûl olup katl olan Varvar Ali Paşa b. Behram’ın sulbî kebîr oğlu ve vârisi olup terekesine vaz‘-ı yed eden Mustafa Bey nâm şâbb-ı âkil ve bâliğ mahzarında üzerine takrîr-i kelâm da‘vâ edip işbu Mustafa Bey’in babası ve mûrisi Varvar Ali Paşa hâl-i sıhhat ve nefâz-ı tasarrufâtında yedimden ve malımdan bin riyâlî kuruş ikrâz ve kabz ve mesârifine sarfla zimmetinde hakkım olduğundan gayrı zikr olunan bin kuruş ile ma‘an yüz riyâlî kuruş kıymetli bir re’s âl erkek atımı dahi benden üç yüz riyâlî kuruşa iştirâ ve kabz ve tesellüm edip vefât etmekle, karzı olan bin riyâlî kuruş hakkım ve semeni olan bin riyâlî üç yüz riyâlî kuruş hakkım zimmetinde kalmışdır, suâl olunup terekesinden alıverilmesin taleb ederim dedikde, gıbbe’s-suâl mezbûr Mustafa Bey husûs-ı mezbûru inkâr edicek, müdde‘î-i mezbûr Hüseyin Bey’den da‘vâ-yı meşrûh[unu] mübeyyine beyine taleb olundukda, udûl-i müslimînden olup mahmiye-i mezbûrede Esirci Kemal mahallesinde sâkin Abaza Mehmed Ağa b. Abdullah ve müteveffâ-yı mezbûrun mühürdârı Ömer Bey b. Hüseyin nâm kimesneler meclis-i ma‘kūdda li ecli’ş-şehâde hâzırân olup gıbbe’l-istişhâd her biri şehâdet edip fi’l-hakīka işbu Mustafa Bey’in babası ve mûrisi müteveffâ-yı mezbûr Varvar Ali Paşa hâl-i sıhhat ve nefâz-ı tasarrufâtından bizim huzûrumuzda işbu müdde‘î Hüseyin Bey’den bin riyâlî kuruş ikrâz ve kabz eylediğinde, işbu Hüseyin Bey’den yüz riyâlî kıymetli bir re’s âl erkek atını dahi üç yüz riyâlî kuruşa bâtten iştirâ ve tesellüm eyledi. Mezbûr Ali Paşa vefât edip karz-ı mezbûr bin riyâlî kuruş ve şirâ-i mezkûr zımn-ı karzdan olmağla zikr olunan atın kıymeti olan yüz riyâlî kuruş zimmetinde işbu Hüseyin Bey’in hakkı kalmağla, tereke-i müteveffâ-yı mezbûrdan edâsı vâcibdir, biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri [makbûle] oldukdan sonra karz-ı mezbûr bin riyâlî kuruş ve kıymet-i mezkûr yüz riyâlî kuruş cem‘an bin yüz riyâlî kuruşu müteveffâ-yı mezbûr Varvar Ali Paşa’dan hâl-i hayâtında ba‘zan asâleten ve vekâleten ahz u kabz eylemediğine veya âhara havâle olmadığına veya turuk-ı şer‘îden ve bir tarîk ile müteveffâ-yı mezbûrun zimmetini ibrâ ve iskāt eylemediğine müdde‘î-i mezbûr Hüseyin Bey’e yemîn teklîf olundukda, ol dahi hasbe’l-mes’ûl yemîn billâhi’l-aliyyi’l-azîm edicek, şehâdet-i mezbûre [mûcebince] karz-ı merkūmdan bin riyâlî kuruş ve kıymet-i mezkûreden yüz riyâlî kuruş cem‘an bin yüz riyâlî kuruşun müdde‘î-i mezbûr Hüseyin Bey’e tereke-i müteveffâ-yı mezbûrdan edâ ve îfâya şerâyiti’l-kabûl hükm mer‘iyye olduğu hâlde hükm-i şer‘î ile hükm olunup mâ vaka‘a bi’t-taleb ketb olundu. Hurrire fi’l-yevmi’t-tâsi‘ ve’l-ışrîn min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Abdülganî Efendi b. Ömer, Halid Ağa b. Mustafa, Sefer Ağa b. Sefer, İsmail Efendi [b.] İbrahim.