Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 70 Hüküm no: 38 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Cerco’nun Rahime Hâtun Vakfı’na borcu olduğu Mahmiye-i İstanbul’da Çadırcı Ahmed mahallesinde sâkin Kosta v. Cerco nâm zimmî meclis-i şer‘-i hatîr-i lâzımü’t-tevkīrde, mahmiye-i İstanbul’da Süleyman Ağa mahallesinde vâki‘ merhûme Rahime Hâtun Vakfı’na bi’l-fi‘l mütevellî olan Perviz Bey b. Abdullah mahzarında tav‘an ikrâr ve i‘tirâf edip mâl-ı vakf-ı mezbûrdan mütevellî-i merkūm Perviz’in yedinden fıddî-i râyic fi’l-vakt yirmi bin akçe iktirâz ve kabz mesârifine sarfla istihlâk eylediğimden sonra yine vakf-ı mezbûrdan olup mütevellî-i mezbûr yedinden müşterâ ve makbûz târih-i kitâbdan sene tamâmına değin müeccel bir mâî iskarlat kâtibî yenli merdâne çuka ferâce semeninden dahi iki bin cedîd akçe cem‘an yirmi iki bin cedîd akçe vakf-ı mezbûra zimmetimde vâcibü’l-edâ ve lâzımü’l-kazâ deynim vardır dedikde, mukırr-ı merkūmu ikrâr-ı meşrûhunda mütevellî-i mezbûr vicâhen tasdîk ve şifâhen tahkīk eyledikden sonra meblağ-ı mezbûr yirmi iki bin cedîd râyic fi’l-vakt akçenin mecmû‘una zikr olunan Çadırcı Ahmed mahallesinden Karaki v. Panayot ve Laskari v. Dimitri ve Manoli v. Nikola nâm zimmîler tarafından emr ve kabûlü hâvî kefâlet-i sahîha-i şer‘iyye ile kefîller olmağın, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Cumâdelâhir li sene tis‘a ve hamsîn ve elf. Şuhûdü’l-hâl: Mustafa Efendi b. ( ) el-imâm, Bayram Bey b. Abdullah, Ahmed Ağa b. Abdi kethüdâ, Ali b. Mahmud, Yahya Bey [b.] Zekeriya.