Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 71 Hüküm no: 40 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Hasan’ın alacak hususunda Sinan Paşa Vakfı mütevellisinin zimmetini ibra ettiği Vilâyet-i Rumeli’nde Kalkandelen kazâsına tâbi‘ Burgos nâm karye sükkânından Mehmed Ağa b. Hasan tarafından husûs-ı âti’l-beyâna vekîl olup vekâleti kazâ-i mezbûra tâbi‘ Krakofça nâm karyeden Osman b. Ali ve mahmiye-i İstanbul’da Gedikpaşa sükkânından Mehmed Ağa b. Hasan el-müteferrika ve Ömer b. Mehmed nâm kimesneler şehâdetleriyle hasm-ı şer‘-i câhid mahzarında sâbite olan İbrahim Bey b. Hasan meclis-i şer‘-i hatîr-i lâzımü’t-tevkīrde, sâbıkan Sinan Paşa Evkāfı’na mütevellî olan işbu râfi‘ül-kitâb Behram Bey b. Abdullah mahzarında vekâleten tav‘an ikrâr ve takrîr-i kelâm edip mezbûr Behram Bey vakf-ı mezbûra mütevellî olduğu hâlde bin elli dokuz senesinde kasaba-i Kaçanik’de vâki‘ merhûm Sinan Paşa Câmi‘-i Şerîfi tevliyetini müvekkilim merkūm Mehmed Ağa’ya tevcîh edip ber vech-i peşîn müvekkilimin yedinden merkūm Behram Bey on sekiz bin cedîd râyic fi’l-vakt akçesini ahz u kabz eyledikden sonra mezbûr Behram Bey tevliyet-i mezbûreden ma‘zûl olup ve câmi‘-i mezbûr tevliyeti dahi âhara tevcîh olunmağın, mezbûr Behram Bey müvekkilimin yedinden makbûzu olan on sekiz bin cedîd akçe hakkını vekâleten da‘vâ ve taleb eylediğimde ikrâr edip lâkin vekâletimi inkâr etmekle, hâkim-i muvakki‘-i kitâb tûbâ-lehû ve hüsnü me’âb huzûrunda şâhidûn-ı mezbûrûn şehâdetleriyle mezbûr Behram Bey muvâcehesinde isbât eylediğimde meblağ-ı mezbûru bana teslîme mezbûr Behram Bey üzerine hükm olunmuşdu. Hâlâ meblağ-ı mezbûr on sekiz bin akçeyi vekâletim hasebiyle müvekkilim için merkūmun yedinden tamâmen alıp kabz eyledim. Min ba‘d üzerinde meblağ-ı mezbûrdan bir akçe ve bir habbe bâkī kalmayıp zimmeti berî olmuşdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’r-râbi‘ ve’l-ışrîn min şehri Rebî‘ilevvel li sene 1059. Şuhûdü’l-hâl: Rûşen Efendi b. İsa, Mehmed b. Mustafa, Mehmed b. Abdullah, Himmet b. Mehmed, el-Hâc Mehmed b. Abdullah.