Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 74 Hüküm no: 44 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Baltacı Mahmud Ağa’ya babası tarafından hibe edilen paranın terekesinden ödenmesi Mahmiye-i İstanbul’da Mercan Ağa mahallesi sükkânından olup bundan akdem tarîk-i hâcc-ı şerîfde vefât eden Baltacı Mahmud Ağa b. Ali’nin sulbiye sagīre kızı Havva’nın tesviye-i umûruna kıbel-i şer‘den mansûbe vasîsi olan vâlidesi Hatice Hâtun bt. Mehmed tarafından meblağ-ı âti’l-beyânı da‘vâ ve taleb ve kabzına ve kendiye îsâle vekîl olup mezbûreyi ma‘rifet-i şer‘iyye ile ârifân olan Mustafa Efendi b. Abdürrahim ve Mehmed Beş b. Ali nâm kimesneler şehâdetleriyle vekâleti sâbite olan Mehmed Ağa b. Veli meclis-i şer‘-i şerîfde, müteveffâ-yı mezbûr Mahmud Ağa’nın evlâd-ı aslâb-ı âharı Ebûbekir Çelebi ve Abdülbâkī Çelebi ve Ayşe Kadın nâm sagīrelerin ammileri kıbel-i şer‘-i enverden mansûb vasîleri olan Mehmed Ağa b. Ali mahzarında üzerine takrîr-i da‘vâ edip müteveffâ-yı mezbûr Mahmud Ağa hâl-i hayât ve nefâz-ı tasarrufâtında kendi malından altı bin riyâlî kuruşu ifrâz eyledikden sonra sulbiye sagīre kızı merkūme Havva’ya hibe-i sahîha ile hibe edip yine kendi sagīre-i mezbûre Havva tarafından velâyeten kabz eylemişdi. Hâlâ meblağ-ı mezbûru mücehhelen mezbûr Mahmud Ağa vefât etmeğin, muhallefâtına vasiyy-i mezbûr vaz‘-ı yed etmekle meblağ-ı mezbûr altı bin riyâlî kuruşun alıverilmesini taleb ederim dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda, udûl-i müslimînden Mercan Ağa Câmi‘i imâmı olan es-Seyyid Ahmed Efendi b. es-Seyyid Mehmed ve mahalle-i mezbûre sükkânından Hızır Efendi b. Mehmed el-müderris nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd, her biri şehâdet edip mahmiye-i İstanbul’da Mercan Ağa mahallesinde sâkin olup bundan akdem tarîk-i hâcc-ı şerîfde vefât eden Baltacı Mahmud Ağa b. Ali hâl-i hayât ve nefâz-ı tasarrufâtında kendi malından altı bin riyâlî kuruşu ifrâz eyledikden sonra sulbiye sagīre kızı merkūme Havva’ya hibe-i sahîha-i şer‘iyye ile bizim huzûrumuzda hibe edip yine kendi sagīre-i mezbûre tarafından velâyeten kabz eyledi. Hâlâ meblağ-ı mezbûru mücehhelen mezbûr Baltacı Mahmud Ağa vefât etmeğin meblağ-ı mezbûr altı bin riyâlî kuruşun tereke-i müteveffâ-yı mezbûrdan sagīre-i mezbûre edâsı vâcibdir, biz bu husûsa şâhidleriz, şehâdet dahi ederiz deyû her biri münkir-i mezbûr muvâcehesinde edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri makbûle olmağın, vasiyy-i sagīre-i mezbûreye yemîn teveccüh etmemekle, şehâdet-i mezbûre mûcebince meblağ-ı mezbûr altı bin riyâlî kuruş vekîl-i mezbûr mahzarında tereke-i müteveffâ-yı mezbûrdan edâya müteveffâ-yı mezbûr üzerine şerâyit-i hükm[-i şer‘î] mer‘iyye olduğu hâlde hükm olunup mâ vaka‘a bi’t-taleb ketb olundu. Fî evâili Saferü’l-hayr li sene 1059. Şuhûdü’l-hâl: Süleyman Ağa b. Pîrî, Mahmud Ağa b. Şehman, İbrahim Çelebi b. Hasan.