Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 74 Hüküm no: 43 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Abdullah’ın küçük kızı Havva’yı büyükannesi Cennet bt. Sefer’e teslim ettiği Vilâyet-i Anadolu’da vâki‘ kasaba-i Doyran ahâlîsinden Celeb Mustafa Bey b. Abdullah meclis-i şer‘de, mahmiye-i İstanbul’da Havuzlu Mescid mahallesinde sâkine olup sulbiye sagīre kızı işbu hâzıra bi’l-meclis Havva’nın ammûmiyet cihetinden ceddesi olan işbu râfi‘atü’l-kitâb Cennet bt. Sefer mahzarında tav‘an ikrâr ve i‘tirâf edip zevcem olup mezbûre Cennet’in kızı olan Emine bt. el-Hâc Osman vefât eyledikde terekesinde ber-mûceb-i defter-i kassâm sagīre-i mezbûreye on beş bin fıddî râyic fi’l-vakt akçe isâbet ve intikāl eylediğinden sonra hakk-ı hıdâne mezbûre Cennet’in olmakla, sagīre-i mezbûreyi ve hisse-i şer‘iyyesi olan meblağ-ı mezbûru ahz u kabz eylediğinden sonra mezbûre Cennet sagīre-i mezbûreye yevmî beş akçe nafaka takdîr ettirip târih-i kitâba gelince meblağ-ı mezbûrdan yedi bin beş yüz akçesi sagīre-i mezbûrenin nafakasına harc u sarf olunup bâkī mezbûre Cennet yedinde yedi bin beş yüz akçe kalıp hâlâ sagīre-i mezbûre dokuz seneye bâliğa olup kesbe kādire olmağla nafakası sâkıt olmağın, meblağ-ı bâkī-i mezbûr yedi bin beş yüz cedîd akçeyi velâyetim hasebiyle merkūme Cennet yedinden ahz u kabz eyledim dedikde, mukırr-ı mezbûrun ikrâr-ı meşrûhunda mezbûre Cennet vicâhen tasdîk ve şifâhen tahkīk eyledikden sonra merkūm Celeb Mustafa Bey sagīre-i mezbûre Havva’yı merkūme Cennet’e terbiye için teslîm eyledim dedikde, mezbûre Cennet dahi bilâ-mürâca‘a kendi malından infâk ve iksâya müte‘ahhid etmeğin, mâ vaka‘a bi’t-taleb ketb olundu. Hurrire fî gurreti şehri Rebî‘ilâhir li sene 1059. Şuhûdü’l-hâl: El-Hâc Musli b. el-Hâc Ali, Hüseyin Beş b. el-Hâc Habib, Ahmed Çelebi b. el-Hâc Ramazan, el-Hâc Mehmed b. Hızır, el-Hâc Hüseyin b. Osman, Hasan Beşe b. el-Hâc Hüseyin.