Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 97 Hüküm no: 75 Orijinal metin no: [19a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Portarya köyü ahalisinin alacak hususunda Galos Muhafızı Hacı İbrahim Paşa b. Abdullah ile sulh oldukları Vilâyet-i Rumeli’nde medîne-i Yenişehir’de Galos nâhiyesine tâbi‘ Portarya nâm karyeden Papa Panayot v. Panayot ve Nikola v. Dimo nâm zimmîler kendi taraflarından asâleten ve karye-i mezbûre ahâlîsinden Yorgo v. Pavlo ve Dimo v. Andriye ve İstamo v. Foto ve İstamo v. Polankü ve Yani v. Mavros ve Aleksi v. Yorgo ve Papa Yani v. Nikola ve Apostol v. Kirihi? ve Nikola v. Kolo ve sâir ahâlî-i karye-i mezbûre taraflarından husûs-ı âti’l-beyânı da‘vâ ve taleb ve ahz u kabza ve lâzım gelirse sulh ve ibrâya taraflarından vekîller olup vekâletleri hüccet-i şer‘iyye ile sâbite oldukdan sonra vekâleten meclis-i şer‘-i hatîr-i lâzımü’t-tevkīrde sâbıkan Galos muhafazasında olan düstûr-ı mükerrem müşîr-i müfahham el-Hâc İbrahim Paşa b. Abdullah tarafından kezâlik ikrâr-ı âti’l-beyânı tasdîka vekîl olup bi mâ hüve nehcü’s-sübût şer‘an vekâleti sâbite olan Mısrî Mehmed Çavuş b. Abdülkerim mahzarında her biri tav‘an bi’l-asâle ve’l-vekâle ikrâr ve i‘tirâf edip müvekkil-i mûmâ-ileyh bundan akdem Galos muhafazasında iken bizi ahz ve habs edip bizden karyemiz ahâlîsi müvekkilimizden nâ-hak dört yüz on kıt‘a riyâlî kuruşumuzu ahz u kabz eylemişdi. Hâlâ müvekkil-i mûmâ-ileyh el-Hâc İbrahim Paşa’ya zafer bulmağla meblağ-ı mezbûru asâleten [ve] vekâletimiz hasebiyle taleb ve da‘vâ eylediğimizde, ol dahi bi’l-külliye inkâr edip bizim dahi beyyinemiz olmamağla, müvekkil-i mûmâ-ileyhe yemîn sadedinde iken beynimize muslihûn tavassut edip meblağ-ı mezbûr da‘vâsından bizi asâleten ve vekâleten müvekkil-i müşârun-ileyh ile kırk kıt‘a riyâlî kuruş üzerine an-inkâr sulh eylediklerinde, biz dahi sulh-ı mezbûru kabûl ve bedel-i sulh olan meblağ-ı mezbûr kırk kıt‘a riyâlî kuruşu meclis-i sulhda müvekkil-i mûmâ-ileyh yedinden asâleten ve vekâleten ahz u kabz edip da‘vâ-yı mezbûremizden berî olup husûs-ı merkūma müte‘allika âmme-i da‘vâdan müvekkil-i müşârun-ileyhin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. Min ba‘d husûs-ı mezbûra müte‘allik müvekkil-i mûmâ-ileyh üzerine bi vechin mine’l-vücûh ve sebebin mine’l-esbâb da‘vâ ve nizâ‘ ve hakkımız kalmadı dediklerinde, mukırrân-ı mezbûrânın asâleten ve vekâleten cârî ve sâdır olan ikrâr-ı meşrûhlarını vekîl-i mezbûr Mehmed Çavuş vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Mehmed Çavuş b. Cevheri, Ebîbekir Ağa b. Mustafa, Abdülkādir Ağa b. ( ), Mehmed Ağa b. Ali, Yahya Bey b. Zekeriya.