Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 96 Hüküm no: 74 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah’ın 30. Yeniçeri Cemaati Vakfı’na olan borcunun muhallefatından ödenmesi Mahmiye-i İstanbul’da zümre-i râcilinden otuzuncu cemâ‘ate mahsûs olan odanın mühimmâtı için mevkūfe olan nükūda bi’l-fi‘l mütevellî olan Mehmed Odabaşı b. Mahmud meclis-i şer‘-i hatîrde, mahmiye-i İstanbul’da bi’l-fi‘l yeniçeri beytülmâlı emîni olup bundan akdem vefât eden cemâ‘at-i mezbûreden Bodur Ali Beşe b. Abdullah nâm râcilin muhallefâtına vâzı‘u’l-yed olduğu şer‘an sâbit olan İlyas Ağa b. Sinan tarafından husûmet-i âti’l-beyâna vekîl olup vekâleti bi mâ hüve nehcü’s-sübût şer‘an sâbite olan Mehmed Beşe b. Mustafa mahzarında üzerine takrîr-i da‘vâ edip mezbûr Bodur Ali Beşe zimmetinde vakf-ı mezbûr malından cihet-i karz-ı şer‘îden yüz kıt‘a riyâlî kuruş olup minvâl-i muharrer üzre vakf-ı mezbûra yüz riyâlî kuruş deyni olduğunu hâl-i hayât ve nefâz-ı tasarrufâtında alâ re’si’l-işhâd ikrâr dahi eyledikden sonra meblağ-ı mezbûru kable’l-îfâ vefât edip zimmetinde kalmağla, terekesinden cânib-i vakfa edâsı vâcibdir hâlâ suâl olunup tevliyetim hasebiyle meblağ-ı mezbûrun tereke-i vâfiyyesinden alıverilmesin taleb ederim dedikde, gıbbe’s-suâl merkūm Mehmed Beşe müvekkili merkūm İlyas Ağa’nın müteveffâ-yı mezbûrun muhallefâtına vaz‘-ı yed eylediğini ikrâr edip lâkin deyn-i mezbûru inkâr edicek, mütevellî-i mezbûrdan da‘vâsını mübeyyine beyyine taleb olundukda udûl-i ahrâr-ı müslimînden Serrâc Mehmed Beşe b. Mahmud ve Mahmud Beşe b. Mustafa ve Mustafa Beşe b. Oruc nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd şehâdet edip fi’l-hakīka zümre-i râcilinin otuzuncu cemâ‘ate mahsûs olan odadan olup bundan [19a] akdem vefât eden Bodur Ali Beşe b. Abdullah nâm râcil hâl-i hayât ve nefâz-ı tasarrufâtında bizim huzûrumuzda zikrolunan oda mühimmâtı için mevkūfe olan nükūddan zimmetimde edâsı vâcib yüz riyâlî kuruş karz deynim vardır deyû ikrâr ve tav‘an i‘tirâf eyledi. Meblağ-ı mezbûr yüz riyâlî kuruşu kable’l-îfâ mezbûr Bodur Ali Beşe vefât edip meblağ-ı mezbûr yüz riyâlî kuruş mezbûr Ali Beşe’nin üzerinde vakf-ı mezbûrun hakkı kalmağla terekesinden edâsı vâcibdir, biz bu husûsa şâhidleriz şehâdet dahi ederiz deyû her biri münkir-i mezbûr muvâcehesinde edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri makbûle oldukdan sonra mütevellî-i mezbûra yemîn teveccüh etmemekle, şehâdet-i mezbûre mûcebince meblağ-ı mezbûr yüz riyâlî kuruşun mütevellî-i mezbûra vakıf için tereke-i müteveffâ-yı mezbûrdan edâya hükm olunup mâ vaka‘a bi’t-taleb ketb olundu. Hurrire fi’l-yevmi’s-sâlis min şehri Rebî‘ilâhir li sene 1059. Şuhûdü’l-hâl: Hüseyin b. Hüseyin, Bayram b. Abdullah, Yahya Bey b. Zekeriya, el-Hâc Ahmed b. Mehmed.