Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 99 Hüküm no: 77 Orijinal metin no: [19b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa Efendi b. İlyas’ın Bosnalı câriyesi Fâtıma’nın hür olduğu Sâbıkan Silistre beylerbeyisi olan düstûr-ı mükerrem müşîr-i müfahham İbrahim Paşa’nın dîvân efendisi ve bostancı oturağı olup mahmiye-i İstanbul’da Nevbethâne mahallesinde sâkin iken vefât eden Mustafa Efendi b. İlyas’ın li ebeveyn karındaşları ve vârisleri Zülfikār ve Abdurrahman ibney İlyas nâm kimesneler meclis-i şer‘-i hatîr-i lâzımü’t-tevkīrde, işbu râfi‘atü’l-kitâb açık kaşlı gök elâ gözlü kırmızı benizli orta boylu Fâtıma nâm câriye muvâcehesinde bi tav‘ihimâ ikrâr ve takrîr-i kelâm edip mûrisimiz mezbûr Mustafa Efendi’nin yedinde ve terbiyesinde olan mezbûre Fâtıma vilâyet-i Bosna’da Travnik nâm kasabada sâkin Yuvan nâm zimmî ve Matka nâm zimmîyeden mütevellîde olup hürretü’l-asldır, bi vechin mine’l-vücûh ve sebebin mine’l-esbâb üzerine da‘vâ ve nizâ‘ımız yokdur dediklerinde, mukırrân-ı mezbûrân Zülfikār ve Abdurrahman’ı minvâl-i meşrûh üzre cârî ve sâdır olan ikrârında el-mukarru lehâ’l-mezbûre Fâtıma bi’l-muvâcehe tasdîk ve bi’l-müşâfehe tahkīk etmeğin, mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min şehri Rebî‘ilâhir li sene 1059. Şuhûdü’l-hâl: Ali Çavuş b. Hasan, Mahmud b. Abdullah, İbrahim b. Mehmed, Hüseyin Çelebi b. Mustafa.