Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 99 Hüküm no: 78 Orijinal metin no: [20a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Sübhanverdi b. Hacı Mehmed’in alacaklı olduğu Sefer Bey b. Bayram ile sulhu Vilâyet-i Anadolu’da Niğde Sancağı’nda Develi kazâsına tâbi‘ Sindelhöyük nâm karye ahâlîsinden el-Hâc Sübhanverdi b. el-Hâc Mehmed meclis-i şer‘-i hatîr-i lâzımü’t-tevkīrde, sâbıkan karye-i mezbûre zâbiti olan Sefer Bey b. Bayram tarafından sulh-ı âti’l-beyâna vekîl olup vekâleti bi mâ hüve nehcü’s-sübût şer‘an sâbite olan Mustafa Bey b. Abdullah mahzarında tav‘an ikrâr ve i‘tirâf edip bundan akdem mezbûr Sefer Bey karyemizde zâbit iken benim için koyun serika etmişsin deyû beni ahz ve habs edip nâ-hak yedimden bir re’s âl iğdiş bârgirimi ve bir re’s kır aygır atımı ve iki kaliçemi ve beş riyâlî kuruşumu ahz u kabz eylemişdi. Hâlâ mârrü’z-zikr iğdiş bârgir ve kır aygır at ve kaliçe ve beş riyâlî kuruş mezbûr Sefer Bey üzerine da‘vâ eylediğimde, ol dahi inkâr edip benim beyyinem olmamağla beynimize muslihûn tavassut edip zikr olunan iğdiş bârgir ve kır atımı ve kaliçe ve beş riyâlî kuruş da‘vâsından beni sulha vekîl olan Mustafa Bey ile yirmi kıt‘a riyâlî kuruş üzerine meclis-i akde müşârun-ileyh kaliçe üzerine an-inkâr sulh eylediklerinde, ben dahi sulh-ı mezbûru kabûl edip bedel-i sulh olan meblağ-ı mezbûr yirmi riyâlî kuruşu ve mârrü’z-zikr kaliçeyi merkūm Mustafa Bey yedinden meclis-i akde bi’t-tamâm ve’l-kemâl ahz u kabz edip husûs-ı mezbûra müte‘allika âmme-i da‘vâdan asîl-i mezbûrun zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim. Min ba‘d husûs-ı mezbûra müte‘allika asîl-i mezbûr üzerine bi vechin mine’l-vücûh ve sebebin mine’l-esbâb da‘vâ ve nizâ‘ım kalmadı dedikde, mukırr-ı mezbûrun vech-i minvâl üzre cârî ve sâdır olan ikrârını el-mukarru lehü’l-merkūm vicâhen tasdîk ve şifâhen tahkīk edicek, mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilâhir li sene 1059. Şuhûdü’l-hâl: Hasan Beşe b. Ahmed, Sefer Beşe b. ( ) er-râcil, Mustafa b. Abdullah, Osman b. Abdullah.