Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 104 Hüküm no: 85 Orijinal metin no: [22a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Malkoç’un Mehmed Beşe b. Ali’ye bazı mülk hisselerini satıp bazılarının da tasarruf hakkını bıraktığı Vilâyet-i Rumeli’nde Piremedi kazâsına tâbi‘ Vetiş nâm karyeden Hasan Beşe b. Malkoç meclis-i şer‘-i hatîr-i lâzımü’t-tevkīrde, yine karye-i mezbûreden işbu râfi‘ül-kitâb Mehmed Beşe b. Ali mahzarında bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafı Hüseyin Beşe b. Ahmed mülküne ve bir tarafı bayıra ve bir tarafı tarîk-i âmma müntehî bir bâb odayı müştemil cemî‘ mülk menzilden benim hisse-i şer‘iyyem olan dört sehimden bir sehm-i şâyi‘ini, cemî‘ tevâbi‘ ve levâhıkı ile ve yine menzil-i mezbûre muttasıl bir tarafı Ali nâm kimesne bağına ve bir tarafı Koca Durmuş bağına ve bir tarafı Mehmed b. Hasan bağına ve bir tarafı tarîk-i âmma müntehî üç çapalık cemî‘ mülk bağdan dahi kezâlik dört sehimden bir sehim hisse-i şâyi‘amı dahi cemî‘ hukūk ve levâhıkı ile ve yine karye-i mezbûre sınırında vâki‘ bir tarafı Mehmed Beşe mülküne ve bir tarafı Mehmed b. Davud mülküne ve bir tarafı vâdiye ve bir tarafı Davud tasarrufunda olan tarlaya müntehî bostan yerinden dahi kezâlik dört sehimden bir sehm-i şâyi‘i hisse-i şer‘iyyemi dahi cemî‘ tevâbi‘ ve levâhıkı ile merkūm Mehmed Beşe’ye bi safkatin vâhidetin iki bin fıddî râyic fi’l-vakt akçeye bey‘-i bâtt-ı sahîh ile bey‘ ve teslîm edip ol dahi minvâl-i muharrer üzre iştirâ ve tesellüm eyledikden sonra yine menzil-i mezbûra muttasıl iki tarafı Hüseyin b. Ahmed tarlasına ve bir tarafı menzil-i mezbûra ve bir tarafı müşterî-i mezbûr Mehmed Beşe bağına müntehî birbirine mülâsık iki kıt‘a tarlanın dahi taht-ı tasarrufumda olan dört sehimden bir sehim hissemi sâhib-i arz ma‘rifetiyle merkūm Mehmed Beşe’ye bin fıddî râyic fi’l-vakt akçe mukābelesinde ferâğ ve tefvîz ve teslîm, ol dahi minvâl-i muharrer üzre tefevvüz ve tesellüm ve kabûl eyledikden sonra hâlâ semen-i mezbûr iki bin akçe ve bedel-i ferâğ olan bin akçe cem‘an üç bin cedîd akçeyi mezbûr Mehmed Beşe yedinden tamâmen ahz u kabz eyledim dedikde, mukırr-ı mezbûru ikrâr-ı meşrûhunda el-mukarru lehü’l-mezbûr vicâhen tasdîk ve şifâhen tahkīk edicek, mâ vaka‘a bi’t-taleb ketb olundu. Hurrire fi’l-yevmi’r-râbi‘ min şehri Rebî‘ilâhir li sene 1059. Şuhûdü’l-hâl: Hasan Beşe b. Ali, Sinan Beşe [b.] Mehmed, Ahmed Beşe b. Mustafa, Durmuş b. Hasan.