Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 103 Hüküm no: 84 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Mehmed’in Saraylı Selâmet Hâtun’dan kalan yarım menzil hissesini Mehmed Ağa b. Ahmed’e sattığı Mahmiye-i İstanbul’da Topkapısı kurbunda Yenikapı dâhilinde Evliyâ Hoca mahallesinde sâkine iken bundan akdem vefât eden Saraylı Selâmet Hâtun bt. Abdullah’ın verâseti, zevc-i metrûku Müteferrika Mehmed Ağa b. Ahmed’e ve sulbî sagīr oğlu Mustafa Çelebi b. Memi Usta’ya ve sulbiye sagīre kızı Ümmühâni’ye münhasıra olup ba‘dehâ mezbûre Ümmühâni vefât edip verâseti babası mezbûr Mehmed Ağa’ya münhasıra olup ba‘dehâ mezbûr Mustafa Çelebi dahi vefât edip verâseti babası mezbûr Memi Usta’nın li ebeveyn ammi oğlu olup Hersek Sancağı’nda Novasin kazâsında Basile [Basilye] nâm karyeden Hasan b. Mehmed’e münhasıra olup ve müteveffât-ı evvelin terekesi bi hasebi’l-münâsahati’l-mezbûre dört sehim i‘tibâr olunup sihâm-ı mezbûreden iki sehimi mezbûr Mehmed Ağa’ya ve iki sehimi dahi mezbûr Hasan’a isâbet eylediği şer‘an mütehakkık oldukdan sonra mezbûr Hasan meclis-i şer‘-i hatîr-i lâzımü’t-tevkīrde, işbu sâhibü’l-kitâb mezbûr Mehmed Ağa mahzarında tav‘an ikrâr ve i‘tirâf edip mahalle-i mezbûrede vâki‘ bir tarafı Canbaz Mehmed Beşe hâtunu İsmihân Hâtun bt. Ahmed mülküne ve bir tarafı Bâli Çelebi b. Abbas mülküne ve bir tarafı Abdurrahman Bey b. ( ) nâm bevvâb-ı Sultânî mülküne ve bir tarafı tarîk-i âmma müntehî iki bâb fevkānî ve bir bâb tahtânî odayı ve ahûru ve müşterek su kuyusunu ve bahçeyi ve kenîfi müştemil cemî‘ menzil müteveffât-ı evvel olan mezbûre Selâmet Hâtun’un terekesinden olup minvâl-i meşrûh üzre menzil-i mezbûrun nısf-ı şâyi‘i oğlu mezbûr Mustafa Çelebi’den bana irs-i şer‘î ile isâbet ve intikāl eyleyip yedime ve taht-ı tasarrufuma dâhil oldukdan sonra cemî‘ menzil-i mezkûrda olan nısf hisse-i şer‘iyyemi, kâffe-i hukūkuyla mezbûr Mehmed Ağa’ya on dokuz bin iki yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm eyledim, ol dahi nefsi için iştirâ ve tesellüm eyleyip semen-i mezbûr on dokuz bin iki yüz akçeyi mezbûr Mehmed Ağa bana def‘ ü teslîm edip ben dahi yedinden tamâmen ahz u kabz eyledim. Min ba‘d cemî‘ menzil-i mezbûr merkūm Mehmed Ağa’nın mülk ve hakkıdır benim bi vechin mine’l-vücûh hakkım kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sânî min şehri Rebî‘ilâhir li sene 1059. Şuhûdü’l-hâl: Abdullah Efendi b. Mehmed imâm, İbrahim Usta b. Mehmed, Ahmed Usta b. Abdullah.