Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 115 Hüküm no: 99 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah’ın 30. Yeniçeri Cemaati Vakfı’na olan borcunun terekesinden ödenmesi Mahmiye-i İstanbul’da zümre-i râcilinin otuzuncu cemâ‘atine mahsûs olan oda mühimmâtı için mevkūfe olan nükūda bi’l-fi‘l meşrûtiyyet üzre mütevellî olan Mehmed Odabaşı b. Mahmud meclis-i şer‘-i şerîfde, mahmiye-i mezbûrede bi’l-fi‘l beytülmâl-ı râcilîn emîni olup bundan akdem zikr olunan odada vefât eden Bodur Ali Beşe b. Abdullah nâm râcilin muhallefâtına zâhirde vâris-i ma‘rûf[u] olmamağla vaz‘-ı yed eden İlyas Ağa b. Sinan tarafından ikrâr-ı âti’l-beyânı tasdîka sâbitü’l-vekâle vekîl olan Mehmed b. Mustafa mahzarında bi’t-tevliye tav‘an ikrâr ve takrîr-i kelâm edip mezbûr Bodur Ali Beşe zimmetinde vakf-ı mezbûr malından cihet-i karz-ı şer‘îden yüz riyâlî kuruş olup kable’l-îfâ vefât edip meblağ-ı mezbûr zimmetinde kalmağın, bundan akdem meblağ-ı mezbûru beyyine-i âdile ile huzûr-ı hâkimde vekîl-i mezbûr Mehmed Efendi muvâcehesinde isbât, tereke-i mezbûrdan hükm olunmuşdu. Hâlâ meblağ-ı mahkûmun-bih yüz riyâlîsi muhallefât-ı müteveffâ-yı mezbûrdan emîn-i merkūm yediyle bi’t-tevliye vakıf için bi’t-tamâm alıp kabz eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Ahmed Çelebi b. Abdülbâkī, Osman Çelebi b. Mehmed, Malkoç Efendi, Hasan Efendi.