Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 114 Hüküm no: 98 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed’in vârisi olmadığı zannıyla beytülmâl tarafından el konulan terekesinin babası Mahmud b. Bektaş’a teslimi Eyâlet-i Rum’da Kazova kazâsına tâbi‘ Tavukçu nâm karyeden Mahmud b. Bektaş nâm kimesne mahfil-i kazâda, mahmiye-i İstanbul’da bi’l-fi‘l beytülmâl-ı râcilîn emîni olan İlyas Ağa b. Sinan tarafından ikrâr-ı âti’l-beyânı tasdîka sâbitü’l-vekâle vekîli olan Mehmed Beşe b. Mustafa mahzarında tav‘an ikrâr ve takrîr-i kelâm edip sulbî oğlum olup bundan akdem mahmiye-i mezbûrede Altmışıncı Solaklar Odası’nda vefât eden Mehmed nâm râcilin vârisi olma[ma]k zu‘mu ile terekesine emîn-i mezbûr İlyas Ağa vaz‘-ı yed etmekle, müteveffâ-yı mezbûr Mehmed Çelebi oğlum olup ve vârisi olduğumu vekîl-i mezbûr Mehmed Beşe muvâcehesinde huzûr-ı hâkimde isbât edip sıhhat-i verâsetime hükm ve emîn-i mezkûrun [mezkûrda] tereke-i müteveffâ-yı mezbûr ba‘de’l-bey‘ üç bin cedîd râyic fi’l-vakt olmağın, meblağ-ı mezbûr üç bin akçeyi merkūm İlyas Ağa’nın yedinden tamâmen alıp kabz eyledim. Min ba‘d tereke-i müteveffâ-yı mezbûrdan emîn-i merkūm yedinde bir habbe kalmamışdır dedikde, mâ hüve’l-vâki‘ bi’t-taleb ketb olundu. Fi’l-yevmi’l-âşir min Rebî‘ilevvel li sene tis‘a ve hamsîn ve elf. Şuhûdü’l-hâl: Ahmed Çelebi b. Abdülbâkī, Yahya Bey [b.] Zekeriya, Ahmed b. Abdullah, el-Hâc Hüseyin b. Mehmed.