Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 119 Hüküm no: 108 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Efendi b. Hüseyin’in mukâtaalı arsa ve mülk menzilini Receb b. Sefer’e sattığı Mahmiye-i İstanbul’da Samanviran mahallesinde sâkin Osman Efendi b. Hüseyin meclis-i şer‘-i şerîfde, işbu râfi‘ül-kitâb Kazzâz Receb b. Sefer mahzarında bi’t-tav‘i’s-sâf ikrâr ve i‘tirâf edip işbu akdin sudûruna değin silk-i mülk ve yedimde muntazam hakkım olup mahmiye-i mezbûrede Mi‘mâr Ayas mahallesinde vâki‘ bir tarafı Kilârî İvaz b. Hacı tasarrufunda olan menzile ve bir tarafı Kara Mehmed veresesi tasarruflarında olan menzile ve bir tarafı Tanburî Mustafa b. Abdullah mülküne ve bir tarafı tarîk-i hâssa müntehî bir bâb fevkānî ve bir bâb tahtânî odaları ve tahtapûşu ve kenîfi müştemil arsasının Sinan Paşa Vakfı’na senede yetmiş akçe mukāta‘ası olup binâsı mülküm olan menzilin cemî‘ mülk ve hakkım olan ebniyesini, cümle hukūkuyla mezbûr Kazzâz Receb’e yirmi bir bin beş yüz cedîd râyic fi’l-vakt akçeye bâtten bey‘ ve teslîm ve arsasını dahi ma‘rifet-i mütevellî-i vakf-ı mezbûr ile tefvîz ve teslîm edip ol dahi iştirâ ve tefevvüz ve tesellüm ettikden sonra semen-i merkūm cedîd yirmi bir bin beş yüz akçeyi merkūm Kazzâz Receb’in yedinden tamâmen alıp kabz eyledim. Ba‘de’l-yevm ebniye-i menzil-i mezbûr mezkûr Kazzâz Receb’in mülk-i müşterâsı ve arsası hakk-ı tefevvüzüdür dedikde, gıbbe’t-tasdîki’ş-şer‘î mâ vaka‘a bi’t-taleb [ketb] olundu. Fi’l-yevmi’s-sâlis min şehri Rebî‘ilâhir li sene 1059. Şuhûdü’l-hâl: Hasan b. Abdülmennân, el-Hâc Osman b. Musa, Mustafa b. Ahmed, Mustafa b. Abdullah.