Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 120 Hüküm no: 109 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdülvehhâb’ın mülk evini Halil Bey b. Ahmed’e sattığı Mahmiye-i İstanbul’da Kurşunlu Türbe kurbunda Kemal Paşazâde mahallesinde sâkine Ayşe Hâtun bt. Abdülvehhâb tarafından ikrâr-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Ahmed b. Mehmed ve Bayram b. Sefer şehâdetleriyle vekâleti sâbite olan sadrî oğlu es-Seyyid Esad Çelebi b. Mehmed meclis-i şer‘-i hatîrde, işbu râfi‘ül-kitâb Halil Bey b. Ahmed nâm cündî mahzarında bi’l-vekâle tav‘an ikrâr ve takrîr-i kelâm edip işbu akdin sudûruna değin müvekkile-i mezkûre Ayşe Hâtun yedinde mülkü ve hakkı olup mahalle-i mezbûrede vâki‘ bir tarafı Nasrullah Efendi mülküne ve bir tarafı tarîk-i âmma ve iki tarafı müvekkilenin âhar mülküne müntehî bir bâb fevkānî ve bir bâb tahtânî odaları ve havluyu müştemil cemî‘ menzilini âmme-i tevâbi‘ ve levâhıkı ve kâffe-i hukūk ve merâfıkı ile beş yüz kıt‘a riyâlî kuruşa merkūm Halil Bey’e bey‘-i bâtla bey‘ ve teslîm edip ol dahi minvâl-i meşrûh üzre iştirâ ve tesellüm ve kabûl ettikden sonra müvekkilem mezkûre Ayşe Hâtun semen-i merkūm beş yüz riyâlî kuruş müşterî-i merkūm Halil Bey’in mülk-i müşterâsıdır, keyfe mâ yeşâ ve yahtâr mutasarrıf olsun dedikde, merkūm Halil Bey mukırr-ı merkūm es-Seyyid Esad Çelebi’yi vekâleten ikrâr-ı meşrûhunda vicâhen tasdîk ve şifâhen tahkīk etmeğin, mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min şehri Rebî‘ilâhir li sene 1059. Şuhûdü’l-hâl: Mehmed b. Ahmed, Receb b. Mehmed, Mehmed b. Ali Müezzinzâde, Mehmed Beşe b. Hüseyin, Mehmed Beşe b. İsmail er-râcil.