Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 121 Hüküm no: 112 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Poliharon v. Panayot’un menzilini Kürkçü Mahmud Bey Vakfı’na istiğlâl yoluyla sattığı Mahmiye-i İstanbul’da Kumkapı’da Muhsine Hâtun mahallesinde Poliharon v. Panayot meclis-i şer‘-i hatîr-i lâzımü’t-tevkīrde, merhûm Kürkçü Mahmud Bey Vakfı’nın kāimmakām-ı mütevellîsi olan işbu râfi‘ül-kitâb Ali Bey b. Abdullah mahzarında tav‘an ikrâr ve i‘tirâf edip zikr olunan akdin sudûruna [değin] silk-i mülk ve yedimde münselik [olup], mahalle-i mezbûrede vâki‘ bir tarafı Memi Ağa b. ( ) mülküne ve iki tarafı Mehmed Ağa b. Abdullah mülküne ve bir tarafı tarîk-i âmma müntehî cemî‘ mülk menzilimi, cemî‘ tevâbi‘ ve levâhıkıyla kāimmakām-ı mezbûra dört yüz otuz kıt‘a riyâlî kuruşa bi tarîki’l-istiğlâl bey‘ ve teslîm edip ol dahi minvâl-i muharrer üzre mâl-ı vakf-ı mezbûr ile vakf-ı merkūm için iştirâ ve tesellüm ve kabûl eyledikden sonra semen-i mezbûr dört yüz otuz kıt‘a riyâlî kuruşu kāimmakām-ı mezbûr yedinden tamâmen ahz u kabz eyledikden sonra mütevellî-i mezbûr menzil-i mahdûd-ı mezbûru ba‘de’t-tahliyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin beş bin iki yüz altı fıddî akçe-i cedîd akçeye bana îcâr ve teslîm edip ben dahi minvâl-i meşrûh üzre tesellüm eyledim dedikde, mukırr-ı mezbûru ikrâr-ı meşrûhunda kāimmakām-ı mezbûr vicâhen tasdîk ve şifâhen tahkīk eylediğinden sonra menzil-i mezbûrun derkine ve ücret-i lâzımesine mahalle-i mezbûre sâkinlerinden olup mukırr-ı mezbûrun şerîki olan Laskari v. Dimitri kefâlet-i sahîha-i şer‘iyye ile [kefîl] olmağın, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min şehri Rebî‘ilâhir li sene tis‘a ve hamsîn ve elf. Şuhûdü’l-hâl: El-Hâc Hasan b. Hızır, Mustafa Halîfe b. Abdullah, es-Seyyid Mehmed b. Ali, Ali Çelebi b. Hasan, Salih Bey b. Ali müezzin, Hasan b. Abdullah, Halil Halîfe el-müezzin.