Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 121 Hüküm no: 111 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Temeşvar Alaybeyi Ahmed Ağa b. İbrahim’in İbrahim Beşe b. Musa’da alacağı olduğu Vilâyet-i Rumeli’nde medîne-i Temeşvar Alaybeyisi olan Ahmed Ağa b. İbrahim meclis-i şer‘de, İbrahim Beşe b. Musa nâm râcil mahzarında üzerine takrîr-i da‘vâ edip mezbûr İbrahim Beşe zimmetinde cihet-i karz-ı şer‘îden beş yüz esedî kuruş hakkım olmağın, meblağ-ı mezbûrdan yüz seksen iki esedî kuruşunu bundan akdem işbu İbrahim Beşe yedinden alıp kabz eylemişdim. Hâlâ meblağ-ı bâkī üç yüz on sekiz esedî kuruş hakkımı taleb eylediğimde vermede ta‘annüd eder, suâl olunup alıverilmesin taleb ederim dedikde, gıbbe’s-suâl mezbûr İbrahim Beşe cevâbında, fi’l-hakīka müdde‘î-i merkūma minvâl-i meşrûh üzre meblağ-ı müdde‘â üç yüz on sekiz esedî kuruş zimmetimde edâsı vâcib deynimdir deyicek, ikrârı mûcebince meblağ-ı müdde‘â üç yüz on sekiz esedî kuruşun müdde‘î-i mezbûra edâsı ile merkūm İbrahim Beşe üzerine ilzâm olunup mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilâhir li sene 1059. Şuhûdü’l-hâl: Sefer Ağa b. İsmail, Ömer Ağa b. Osman, Mustafa Bey b. Abdüsselâm.