Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 126 Hüküm no: 117 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Ali’nin ölen küçük kardeşi Ali Çelebi’nin terekesiyle ilgili vasîsinin zimmetini ibra ettiği Mahmiye-i İstanbul’da Mi‘mâr Ayas mahallesinde sâkin iken bundan [akdem] vefât eden Ali Bey b. Mehmed’in sulbî sagīr oğlu olup ba‘dehû vefât eden Ali Çelebi’nin li ebeveyn karındaşı ve bi’l-inhisâr vârisi olup mahalle-i mezbûrede sâkin Mehmed Bey meclis-i şer‘de, müteveffâ-yı mezbûr Ali Çelebi’nin tesviye-i umûruna kıbel-i şer‘-i enverden mansûb vasî olan işbu sâhibü’l-kitâb el-Hâc Hüseyin b. el-Hâc Hüseyin mahzarında tav‘an ikrâr ve i‘tirâf edip babam ve mûrisim mezbûr Ali Bey vefât eyledikde karındaşım ve mûrisim müteveffâ-yı mezbûrun hissesine menzilden gayrı sâir terekesinden dokuz bin dokuz yüz altmış akçe isâbet eylediğinden gayrı mezbûr Ali Çelebi’nin vâlidesi olup mukaddemâ vefât eden Belkıs Hâtun bt. Sinan’ın terekesinden dahi beş bin altı yüz altmış bir akçe isâbet etmekle, zikr olunan dokuz bin dokuz yüz altmış bir akçe ile beş bin altı yüz altmış bir akçe cem‘an on beş bin altı yüz yirmi iki fıddî-i cedîd râyic fi’l-vakt akçeye mezbûr el-Hâc Hüseyin bi’l-vesâye vaz‘-ı yed edip karındaşım mezbûr vefât etmekle meblağ-ı mezbûr on beş bin altı yüz yirmi iki akçe bana irs-i şer‘î ile intikāl ve isâbet eylemekle, ben dahi meblağ-ı mezbûr on beş bin altı yüz yirmi iki akçeyi vasiyy-i mezbûr yedinden tamâmen ahz u kabz eyledim. Min ba‘d karındaşım mezbûrun terekesine müte‘allika mezbûr el-Hâc Hüseyin üzerine bi vechin mine’l-vücûh ve sebebin mine’l-esbâb da‘vâ ve hakkım kalmadı ve ben dahi bundan akdem mezbûr el-Hâc Hüseyin’e iki bin cedîd akçe vedî‘at vaz‘ ve teslîm edip ol dahi ahz u kabz eylemişdi. El-hâletü hâzihî vedî‘at olan meblağ-ı mezkûr iki bin akçeyi dahi bi aynihî mezbûr el-Hâc Hüseyin yedinden tamâmen ahz u kabz eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Umdetü’l-müderrisîni’l-kirâm Abdullah Efendi b. Osman Efendi, el-Hâc İbrahim Beşe b. Hasan, Hasan Beşe b. Mehmed, Yahya b. Zekeriya, İsa Çelebi b. Ahmed, İsmail Çelebi b. Yusuf.