Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 125 Hüküm no: 116 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Mehmed’in Saraylı Selâmet Hâtun’un mirası hususunda diğer vârislerin zimmetini ibra ettiği Mahmiye-i İstanbul’da Topkapısı kurbunda Yenikapı dâhilinde Evliyâ Hoca mahallesinde sâkin olup medîne-i Üsküdar kazâsına tâbi‘ İstavros nâm karyede vefât eden Saraylı Selâmet Hâtun’un verâseti, zevc-i metrûku Mehmed Ağa b. Ahmed’e ve sadrî sagīr oğlu Mustafa b. Memi Usta’ya ve sadriye sagīre kızı Ümmühâni bt. Mehmed Ağa’ya münhasıra olup ba‘dehû mezbûr Mustafa dahi vefât edip verâseti li ebeveyn ammi oğlu olup [Novasin] kazâsına tâbi‘ Basilye nâm karyede sâkin Hasan b. Mehmed mahzarında [vekîl] olduğu şer‘an mütehakkıka oldukdan sonra mezbûr Hasan meclis-i şer‘-i hatîrde, sagīr-i mezbûrun tesviye-i umûruna kıbel-i şer‘-i enverden mansûb vasîsi olup mezbûre Selâmet Hâtun’un tereke-i menkūlesinin vech-i âtî üzre ba‘de’l-bey‘ intikāl edip hisseye vaz‘-ı yed eyleyen işbu sâhibü’l-kitâb Sefer Usta b. Sinan mahzarında bi’l-verâse tav‘an ikrâr ve i‘tirâf edip müteveffât-ı mezbûre Selâmet Hâtun’un tereke-i menkūle bey‘ olundukda semeni bin yüz riyâlî kuruş eyledikde, nısfı beş yüz elli riyâlî kuruşu mezbûr Sefer Usta bi’l-vesâye ahz u kabz eyledikden sonra mezbûr Sefer Usta sagīr-i mezbûrun hâl-i sıhhatinde nafaka ve kisvesine vefâtında techîz ve tekfînine ve benim karye-i mezbûreden mahmiye-i İstanbul’da gelmek için yol mesârifine emrimle sarfından sonra mezbûr Sefer Usta yedinde ancak on riyâlî kuruş kalmağla, meblağ-ı bâkī on riyâlî kuruşu vasiyy-i mezbûr Sefer Usta yedinden tamâmen ahz u kabz eyleyip meblağ-ı mezkûr beş yüz elli riyâlî kuruşa müte‘allika mezbûr Sefer Usta üzerinde bi vechin mine’l-vücûh ve sebebin mine’l-esbâb da‘vâ ve hakkım kalmadı [dedikde], el-mukarru lehü’l-mezbûr Sefer Usta vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’r-râ[bi‘ min şehri] Rebî‘ilâhir li sene tis‘a ve hamsîn ve elf. Şuhûdü’l-hâl: Hasan Bey b. Şaban Küçükpazar’da, Hasan Efendi b. Hüseyin el-imâm, Osman Beşe b. ( ) er-râcil, Murat Usta b. Hüseyin, Ahmed Beşe b. Musa er-râcil, Hüseyin b. Mercan el-kazzâz, Mustafa b. Ahmed el-hallâk, Mehmed Halîfe b. İsmail el-müezzin.