Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 127 Hüküm no: 119 Orijinal metin no: [29a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Ağa’nın Yahya b. Mehmed ve Mustafa Bey b. Abdullah’ta alacağı olduğu Mahmiye-i İstanbul’da Davudpaşa mahallesinde sâkin işbu râfi‘ü’l-vesîka Yusuf Ağa b. ( ) meclis-i şer‘-i hatîrde, mahmiye-i mezbûrede Lütfi mahallesinde sâkin Yahya b. Mehmed ve Mi‘mâr Ayas mahallesinde sâkin Mustafa Bey b. Abdullah mahzarında her biri üzerlerine takrîr-i da‘vâ edip bundan akdem işbu Yahya Bey’e ve Mustafa Bey’e her birine bin riyâlî kuruş ikrâz ve teslîm edip onlar dahi her biri bin riyâlî kuruş iktirâz ve tesellüm eyledikden sonra işbu Yahya Bey zimmetinde deyn olan bin riyâlî kuruşdan üç yüz riyâlî kuruşunu işbu Mustafa Bey dahi zimmetinde deyn olan bin riyâlî kuruşdan dokuz yüz riyâlî kuruşunu bana def‘ ve teslîm edip ben dahi her birinden vech-i meşrûh üzre ahz u kabz eyleyip işbu Yahya Bey zimmetinde yedi yüz riyâlî kuruş hakkım ve işbu Mustafa Bey zimmetinde dahi yüz riyâlî kuruş hakkım kalmışdır, edâda ta‘annüd eder suâl olunup alıverilmesin taleb ederim dedikde, gıbbe’s-suâl mezkûrân Yahya Bey ve Mustafa Bey cevâblarında, işbu Yusuf Ağa’dan ma‘an ancak doksan bin cedîd râyic fi’l-vakt [akçe] iktirâz ve kabz eyledik ve bi şarti’l-ikrâz dahi yetmiş bin cedîd akçeye yetmiş aded mutallâ [29b] tülbent ve bir vakıyye üç yüz dirhem ûdunu yedinden iştirâ ve tesellüm eyledik, ba‘dehû Yusuf Ağa’dan iki bin riyâlî kuruş iktirâz eyleyip karzdan zimmetimizde iki bin riyâlî kuruş deynimiz vardır deyû kâziben ikrâr eyledikde, minvâl-i meşrûh üzre karz zimmetinde olan akd-i şerâyit fâsid olup iştirâ eylediğimiz eşyâ-i mezkûreyi yedimizden ihrâcla istihlâk eylemekle, yevm-i iştirâmızda kıymet-i şer‘iyyesini edâ eder dediklerinde, gıbbe’l-istintâk müdde‘î-i mezkûr Yusuf Ağa mezkûrân Yahya Bey ve Mustafa Bey ikrâr-ı meşrûhlarında sâdıklardır dedikde, İmâm Ebû Yusuf hazretleri mezheb-i şerîflerinde mezkûr Yusuf Ağa’ya yemîn lâzım gelmeğin, bi’l-istihlâf mezkûr Yusuf Ağa’ya minvâl-i meşrûh üzre karz da‘vâsında mubtıl olduğuna ve mezkûrân Yahya Bey ve Mustafa dahi her biri ikrâr-ı meşrûhlarında kâzibler olmadığına yemîn teklîf olundukda, ol dahi hasbe’l-mes’ûl yemîn billâhi’l-aliyyi’l-azîm edicek, vech-i meşrûh üzre meblağ-ı bâkī yedi yüz riyâlî kuruş edâya mezkûr Yahya Bey üzerine ve meblağ-ı mezbûr yüz riyâlî kuruşu dahi edâya mezkûr Mustafa Bey üzerine hükm-i şer‘î ile hükm olunup mâ vaka‘a bi’t-taleb ketb olundu. Hurrire fi’l-yevmi’l-âşir min şehri Rebî‘ilâhir li sene [tis‘a] ve hamsîn ve elf. Şuhûdü’l-hâl: Mehmed Çelebi b. Ahmed Sancakdârzâde, Musa b. Muharrem, Mustafa Ağa b. Abdurrahman, Yusuf Çavuş b. Abdullah el-mübâşir, el-Hâc Mahmud b. Şaban.