Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 128 Hüküm no: 120 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üftâde bt. Abdullah’ın beytülmâl tarafından el konulan terekesi içindeki emanet eşyanın sahibi İsmail Çavuş b. Abdullah’a teslimi Dârü’l-hilâfeti’l-aliyye mahmiye-i Kostantıniyye’de sâbıkan Beytülmâl-ı hâs emîni olan Osman Ağa b. ( ) meclis-i şer‘-i hatîr-i lâzımü’t-tevkīrde, el-Hâc Mustafa Ağa’nın etbâ‘ından İsmail Çavuş b. Abdullah mahzarında takrîr-i kelâm edip mahmiye-i mezbûrede Uzun Şücâ‘ mahallesinde Kırkodalar demekle ma‘rûf odalarda sâkin işbu hâzır bi’l-meclis Yusuf Bey b. Abdullah’ın zevcesi Üftâde bt. Abdullah fevt olup terekesinin nısfı beytülmâla âid oldukda, işbu dört sepet sandıkı içinde mevcûd eşyâsıyla ayaklı ağaç sandık içinde mevcûd eşyâsıyla müteveffât-ı mezbûrenin terekesinden olmak üzre taraf-ı beytülmâl için kabz olunup hâlâ düstûr-ı a‘zam müşîr-i efham vezîriâzam hazretlerinin saraylarında emânet vaz‘ olunup ba‘dehû mezbûr İsmail Çavuş’un mezbûre Üftâde yedinde vedî‘at eylediği mütehakkık oldukda, yine mezbûr İsmail Çavuş’a teslîm olunmak lâzım gelmeğin hâlâ teslîm eyledi dedikde, mezbûr İsmail Çavuş dahi meclis-i şer‘de zikr olunan dört sepet sandığı içinde vedî‘a olan eşyâya müte‘allika mezbûr Osman Ağa üzerine merkūm Yusuf Bey üzerine ve sadr-ı a‘zam hazretlerinin mehterbaşısı el-Hâc Ahmed Ağa b. ( ) üzerine bi vechin mine’l-vücûh ve sebebin mine’l-esbâb da‘vâ ve hakkım yokdur dedikde, mâ hüve’l-vâki‘ bi’t-taleb ketb olundu. Sene 1059. Şuhûdü’l-hâl: Umdetü’l-emâcid ve’l-a‘yân el-Hâc Mustafa Ağa, Mehmed Çavuş b. Abdullah çavuş-ı selâm, Seyyid Mustafa b. Abdullah Efendi, Şahin Çavuş b. ( ), Yusuf Çavuş, Ali Çelebi b. Ahmed, Mustafa Efendi kâtibü’l-hurûf, Ahmed Çelebi b. Abdurrahman el-muhzırân.