Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 135 Hüküm no: 127 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pergam v. Panos’dan intikal eden menzilin vârisleri tarafından Kohen v. Ağya’ya satıldığı Mahmiye-i İstanbul’da İnebey mahallesinde sâkin iken bundan akdem hâlik olan Pergam v. Panos nâm Ermeni zimmînin sulbî kebîr oğlu Asodor ve sulbiye kebîre kızı Marota nâm Ermeni zimmîler asâleten [ve] hâlik-i merkūmun zevce-i metrûkesi Mer? bt. Markom nâm Ermeniye zimmîye kendi tarafından asâleten ve sadrî sagīr oğulları hâlik-i merkūmun sulbî oğulları olan Simo ve Karola’nın tesviye-i umûrlarına kıbel-i şer‘-i enverden mansûb vasîleri olmağla vesâyeten meclis-i şer‘-i hatîr-i lâzımü’t-tevkīrde, işbu râfi‘ül-kitâb Ko[hen] v. Ağya nâm Ermeni zimmî mahzarında tav‘an her biri ikrâr ve i‘tirâf edip mûrisimiz Pergam hâlik oldukda cemî‘ terekesi seksen beş bin fıddî râyic fi’l-vakt akçe oldukda, meblağ-ı mezbûr sagīrân-ı mezbûrâna irs-i şer‘î ile intikāl eyledikden sonra bizim ve sagīrân-ı mezbûrânın süknâları olmamağla, mahalle-i mezbûrede vâki‘ bir tarafı bt. Sihak mülküne ve bir tarafı Medîne-i Münevvere Vakfı olup Siyavuş bt. Abdullah tasarrufunda olan menzile ve bir tarafı Bezzâzistân-ı Cedîd Kethüdâsı Vakfı olan odalara ve bir tarafı tarîk-i âmma müntehî dört bâb fevkānî odaları ve tahtında bir bâb dükkânı ve iki su kuyusunu ve kenîfi ve havluyu müştemil olan cemî‘ menzil li ecli’s-süknâ kendimiz için ve sagīrân-ı mezbûrân için bi’l-asâle ve’l-vesâye seksen beş bin fıddî-i cedîd akçe Siyavuş bt. Abdullah nâm hâtundan iştirâ ve tesellüm ve teslîm-i semen-i mezbûr edip cemî‘ menzil-i mezkûr bizim ve sagīrân-ı mezbûrânın yedimizde mülk ve hakkımız olmuşdur. Lâkin ba‘de’l-iştirâ hâlik-i merkūm Pergam’ın Asodor v. Yani nâm Ermeni zimmîye otuz esedî kuruş düyûn-ı müsbitesi zâhire olup hâlik-i mezbû[run] tereke-i âhiresi olmamağla menzil-i mezbûrun bey‘-i lâzım gelmeğin, menzil-i mezbûr sûk-ı sultânîde müddet-i medîde bey‘a arz olunup gıbbe istintâkı’r-rağbe dokuz yüz riyâlî kuruşa mezbûr Kohen üzerinde ikrâr edip ziyâde ile tâlib-i âhar olmadığından gayrı menzil-i mezkûrun işbu yevm-i akidde semen-i misli meblağ-ı mezkûr dokuz yüz riyâlî kuruş idiğine udûl-i ehl-i vukūf dahi takvîm-i sahîh ile takvîm eylemekle, biz dahi asâlet ve vesâyetimiz hasebi ile zikr olunan cemî‘ menzil-i mezkûru kâffe-i hukūkuyla mezkûr Kohen’e dokuz yüz riyâlî kuruşa tarafeynden îcâb ve kabûlü hâvî bey‘-i bâtla bey‘ ve teslîm eyledikde, ol dahi nefsi için iştirâ ve tesellüm edip semen-i merkūm dokuz yüz riyâlî kuruşu bize teslîm edip biz dahi ba‘de’s-sahîh yedinden bi’l-asâle ve’l-vesâye tamâmen ahz u kabz ve istîfâ eylediğimizde, ba‘de cemî‘ [menzil-i] mezkûr [mülk-i] müşterâsı ve hakk-ı sırfıdır dediklerinde, mukırrûn-ı mezbûrûnun ikrâr-ı meşrûhlarını el-mukarru lehü’l-merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Hasan Efendi b. Mehmed el-imâm, Abdülganî b. Ali el-müezzin, Ali Çavuş b. İsa, Mustafa Bey [b.] Mehmed, Sefer Beşe b. Abdullah, İsa b. Mehmed, Yahya b. Zekeriya. Papa Karabet v. David, Papa Avanos v. Bedros, Aleskan v. Murad, David? v. Seldon.