Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 133 Hüküm no: 126 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Odabaşı b. Musli’nın Hasan Ağa b. Abdülmennân’da olan alacağının terekesinden ödenmesi Mahmiye-i İstanbul’da zümre-i râcilinin seksen beşinci cemâ‘atine mahsûs olan odanın odabaşısı olan işbu râfi‘ül-kitâb İsmail Odabaşı b. Musli meclis-i şer‘-i şerîfde, bundan akdem Van muhafazasında iken vefât eden cemâ‘at-i mezbûre çorbacısı Hasan Ağa b. Abdülmennân’ın zâhirde vâris-i ma‘rûfu olmamağla, bi’l-fi‘l beytülmâl-ı râcilîn emîni olup muhallefât-ı müteveffâ-yı mezbûra vaz‘-ı yed eylediği şer‘an sâbit olan İlyas Ağa b. Sinan tarafından husûmete vekîl olup vekâleti bi mâ hüve nehcü’s-sübût şer‘an sâbite olan Mehmed Beşe b. Mustafa mahzarında üzerine takrîr-i da‘vâ edip mezbûr Hasan Ağa hâl-i hayâtında ve kemâl-i akl ve sıhhatinde kendi malımdan ifrâzla benden bir def‘a iki yüz kırk riyâlî kuruş iktirâz ve kabz edip ve bir def‘a dahi altmış beş riyâlî kuruş iktirâz ve tesellüm eyledikden sonra def‘a-i sâniyyede iktirâz eylediği altmış beş riyâlî kuruş alâ re’si’l-işhâd mezbûr Hasan Ağa ikrâr edip meblağ-ı mezbûr cem‘an üç yüz beş riyâlî kuruş hakkım zimmetinde iken kable’l-îfâ vefât etmeğin, emîn-i merkūm tereke-i merkūma vaz‘-ı yed etmekle meblağ-ı mezbûr üç yüz beş riyâlî kuruşu tereke-i müteveffâ-yı mezbûrdan taleb ederim, vekîl-i merkūm Mehmed Beşe’ye suâl olunsun dedikde, gıbbe’s-suâl vekîl-i mezbûr cevâbında, müvekkili emîn-i merkūm İlyas Ağa müteveffâ-yı merkūmun muhallefâtına vaz‘-ı yed eylediğini ikrâr edip lâkin deyn-i merkūmu inkâr edicek müdde‘î-i merkūmdan müdde‘âsını mübeyyine beyyine taleb olundukda, udûl-i müslimînden olup cemâ‘at-i mezbûreden Bilecikli Mustafa Beşe b. Ali ve doksan dokuzuncu cemâ‘atin vekîl-i harcı olan Ahmed Çelebi b. Pervâne nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd, her biri şehâdet edip fi’l-hakīka seksen beşinci cemâ‘atin çorbacısı olup Van muhafazasında iken vefât eden Hasan Ağa b. Abdülmennân hâl-i hayâtında ve kemâl-i akl ve sıhhatinde işbu müdde‘î İsmail Odabaşı’nın ikrâz ile bizim huzûrumuzda iki yüz kırk riyâlî [kuruş] iktirâz ve tesellüm eyledi. Meblağ-ı mezkûr iki yüz kırk riyâlî kuruş iktirâz eyledi. Meblağ-ı mezkûr iki yüz kırk riyâlî kuruş işbu müdde‘î İsmail Odabaşı’nın mezkûr Hasan Ağa zimmetinde hakkıdır, vefât edip zimmetinde kalmağın terekesinden edâsı vâcibdir, biz bu husûsa bu vech üzre şâhidleriz, şehâdet dahi ederiz deyû her biri münkir-i merkūm muvâcehesinde edâ-i şehâdet-i şer‘iyye eylediklerinde, gıbbe ri‘âyeti [şerâyiti’l-] kabûl şehâdetleri makbûle oldukdan sonra müdde‘î-i mezbûrun meblağ-ı mezkûr altmış beş riyâlî kuruş da‘vâsını mübeyyine beyyine taleb olundukda, udûl-i ahrâr-ı ricâl-i müslimînden olup medîne-i Üsküdar’da Arakiyyeci mahallesinden Rıdvan Beşe b. Abdullah ve kasaba-i Balıkesri’den Mustafa b. Ahmed nâm kimesneler li ecli’ş-şehâde meclis-i şer‘-i hatîrde hâzırân olup gıbbe’l-istişhâd, her biri şehâdet edip fi’l-hakīka seksen beşinci cemâ‘atinin çorbacısı olan Van muhafazasında vefât eden Hasan Ağa b. Abdülmennân hâl-i sıhhat ve nefâz-ı tasarrufâtında cihet-i karz-ı şer‘îden işbu İsmail Odabaşı’na altmış beş riyâlî kuruş zimmetinde vâcibü’l-edâ deynim vardır deyû bizim huzûrumuzda tav‘an ikrâr eyledi. İkrâr-ı meşrûhu mûcebince meblağ-ı mezkûr altmış beş riyâlî kuruş müteveffâ-yı mezbûr zimmetinde işbu müdde‘î İsmail Odabaşı’nın hakkıdır mezbûr Hasan Ağa’nın vefât edip zimmetinde kalmağla terekesinden edâsı vâcibdir, biz bu husûsa şâhidleriz, şehâdet dahi ederiz deyû her biri münkir-i mezbûr muvâcehesinde edâ-i şehâdet-i şer‘iyye eylediklerinde, gıbbe ri‘âyeti şerâyiti’l-kabûl şehâdetleri makbûle oldukdan sonra meblağayn-i mezkûreyn iki yüz riyâlî kuruş ve altmış beş riyâlî kuruş cem‘an üç yüz beş riyâlî kuruşu müteveffâ-yı mezbûr Hasan Ağa’dan hâl-i hayâtında küllen ve ba‘zan asâleten veya vekâleten ahz u kabz eylemediğine veya âhara havâle eylemediğine veya turuk-ı şer‘iyyeden bir tarîk ile müteveffâ-yı mezbûrun zimmetini ibrâ eylemediğine mezbûr İsmail Odabaşı’ya yemîn teklîf olundukda, ol dahi alâ vefki’l-mes’ûl yemîn billâhi’l-azîm edicek, şehâdet-i merkūme mûcebince meblağ-ı müdde‘â üç yüz beş riyâlî kuruşa müdde‘î-i mezbûr İsmail Odabaşı’ya tereke-i müteveffâ-yı mezbûrdan edâya şerâyit-i hükm-i şer‘î mer‘iyye olduğu hâlde hükm olunup mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Ali Bey b. Mustafa el-cündî, el-Hâc Ahmed Efendi b. Muharrem kâtib-i Dîvân-ı âlî, Süleyman Ağa b. Pîrî sermuhzırân-ı Rumeli, Osman Çelebi b. ( ) el-kadı?, Yahya Bey [b.] Zekeriya.