Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 136 Hüküm no: 129 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Yorgi v. Polo’nun 14. Yeniçeri Cemaati Vakfı’na borcu olduğu Vilâyet-i Rumeli’nde Yenişehir kazâsına tâbi‘ Kûhistan nâhiyesinde vâki‘ Büyükkirsova nâm karye sükkânından olup mahmiye-i İstanbul’da Direk kurbunda bakkal olan Yorgi v. Polo nâm zimmî meclis-i şer‘-i şerîfde, zümre-i râcilinin On Dördüncü cemâ‘atine mahsûs olan oda mühimmâtı için mevkūfe olan nükūda meşrûtiyyet üzre mütevellî olan Hacı Murad Beşe b. Mehmed mahzarında tav‘an ikrâr ve takrîr-i kelâm edip def‘a-i mezbûre cihet-i karz-ı şer‘îden fıddî râyic fi’l-vakt on altı bin cedîd akçe ile elli riyâlî kuruş zimmetimde vâcibü’l-edâ ve lâzımü’l-kazâ deynim olduğundan gayrı vakf-ı mezbûr malından mütevellî-i mezkûr yedinden müşterâ ve makbûzum olup târih-i kitâbdan bir sene tamâmına değin müeccel zerdavâ kürk kaplı bir mor iskarlat merdâne ferâce semeninden dahi üç bin cedîd akçe cem‘an on dokuz bin cedîd akçe ve elli riyâlî kuruş vakf-ı mezbûra zimmetimde edâsı vâcib deynimdir dedikde, gıbbe’t-tasdîki’ş-şer‘î bakkal tâifesinin ve karye-i mezbûre ahâlîsinden Mavridi v. Yorgi ve Yorgi v. Dimitri ve Yorgi v. Nikola ve Dimitri v. İstiryanos ve Panayot v. Hristodole ve Aristodifi v. Hristodole nâm zimmîlerden her biri meblağ-ı mezbûr on dokuz bin cedîd akçe ve elli riyâlî kuruşa tarafeynden emr ve kabûlü hâviye kefâletle kefîl olmağın mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ilâhir li sene tis‘a ve hamsîn ve elf. Şuhûdü’l-hâl: es-Seyyid Ömer Çelebi el-müezzin, el-Hâc Ömer b. Ali, Mustafa b. Mehmed, İsmail b. İsrail, Musli Beşe el-mübâşir?