Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 137 Hüküm no: 130 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Ağa b. Abdülmennân’ın Gazanfer Bey b. Abdullah’ta alacağı olduğu Mahmiye-i İstanbul’da merhûm Sultan Selim Hân -aleyhi’r-rahmetü ve’l-gufrân- câmi‘-i şerîfi kurbunda sâkin işbu râfi‘ül-kitâb İbrahim Ağa b. Abdülmennân nâm müteferrika meclis-i şer‘-i hatîr-i lâzımü’t-tevkīrde, mahmiye-i mezbûrede Mahmudpaşa kurbunda Çâşnigir odalarında sâkin Gazanfer Bey b. Abdullah mahzarında üzerine da‘vâ ve takrîr-i kelâm edip mezbûr Gazanfer Bey zimmetinde cihet-i deyn-i şer‘îden iki yüz riyâlî kuruş hakkım olup meblağ-ı mezbûrun yüz seksen riyâlî kuruşunu ahz u kabz edip bâkī zimmetinde yirmi riyâlî kuruşu vardır, suâl olunup alıverilmesini taleb ederim dedikde, gıbbe’s-suâl mezbûr Gazanfer Bey cevâbında, fi’l-hakīka müdde‘î-i mezbûr İbrahim Ağa’ya vech-i meşrûh üzre deyn-i şer‘îden iki yüz riyâlî kuruş deynim olup meblağ-ı mezbûr seksen riyâlî kuruşu kendiye def‘ ve teslîm edip bâkī zimmetimde müdde‘î-i mezbûr İbrahim Ağa’ya vâcibü’l-edâ ve lâzımü’l-kazâ yirmi riyâlî kuruş deynim vardır deyû bi tav‘ihî ikrâr ve i‘tirâf etmeğin, ikrârı mûcebince meblağ-ı müdde‘â yirmi riyâlî kuruşu müdde‘î-i mezbûr İbrahim Ağa’ya edâ ve teslîme mezbûr Gazanfer Bey üzerine hükm olunup mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Ahmed Efendi b. Abdülbâkī Efendi, Ali Çavuş b. Yusuf el-mübâşir, Kenan Bey b. Abdullah, Yahya Bey [b.] Zekeriya.