Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 143 Hüküm no: 140 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa b. Abdullah’ın Mehmed b. Abdullah’ta tesbih ve tîrkeş satışından alacağı olduğu Mahmiye-i İstanbul’da Mimar Kemal mahallesinde sâkin Musa b. Abdullah nâm kimesne meclis-i şer‘-i şerîfde Mehmed b. Abdullah nâm kimesne mahzarında üzerine takrîr-i da‘vâ edip mezbûr Mehmed zimmetinde yedimden müşterâ ve makbûz doksan dokuz tane mercan tesbîh ve tîrkeş bahâlarından kırk sekiz riyâlî kuruş hakkım vardır. Hâlâ suâl olunup meblağ-ı mezbûrun alıverilmesin taleb ederim dedikde, gıbbe’s-suâl mezbûr Mehmed cevâbında, fi’l-vâki‘ işbu müdde‘î Musa’ya minvâl-i muharrer üzre doksan dokuz tane bir mercan tesbîh ve tîrkeş bahâlarından kırk sekiz riyâlî kuruşu zimmetimde edâsı vâcib deynimdir dedikde, ikrâr[ı] mûcebince meblağ-ı müdde‘â kırk sekiz riyâlî kuruşun müdde‘î-i mezbûr Musa’ya edâsı merkūm Mehmed üzerine ilzâm olunup mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî aşer min şehri Rebî‘ilâhir li sene tis‘a ve hamsîn ve elf. Şuhûdü’l-hâl: İbrahim b. Abdullah, Zülfikār b. Abdullah, Mustafa b. Mehmed, Yahya b. Zekeriya.