Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 143 Hüküm no: 141 Orijinal metin no: [33b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meyrem bt. Şahmir ve Nazar bt. Yani’nin mülk menzillerini Ayayi v. Ahican’a kiraya verdikleri Mahmiye-i İstanbul’da Şeyh Ferhad mahallesi sâkinelerinden Meyrem bt. Şahmir ve Nazar bt. Yani nâm Ermeniyeler taraflarından husûs-ı âti’l-beyâna vekîl olup İstefanoz v. Paruh ve Yagob v. Nersis nâm Ermeni zimmîler şehâdetleriyle vekâleti sâbite olan Mıgırdiç v. Sefer nâm Ermeni zimmî meclis-i şer‘-i şerîfde, işbu râfi‘ül-kitâb Ayayi v. Ahîcan nâm Ermeni zimmî mahzarında bi’l-vekâle tav‘an ikrâr ve i‘tirâf edip müvekkilelerim mezkûretân Meyrem ve Nazar silk-i mülklerinde ve yedlerinde münselik ve hakları olup mahalle-i mezbûrede vâki‘ bir tarafından Ayayi v. Serkis mülküne ve bir tarafı tarîk-i âmma müntehî dört bâb odayı müştemil cemî‘ menzillerini, beher ay yüz yetmiş râyic [fi’l-]vakt akçeye olmak üzre târih-i kitâbdan iki sene tamâmına değin mezbûr İsayi’ye dört bin seksen akçeye îcâr ve teslîm eylediklerinde, mezbûr Ayayi dahi istîcâr ve kabûl ve tesellüm eyledikde, mezbûr Ayayi mukırr-ı merkūm Mıgırdiç’i vekâleti cârî ve sâdır olan ikrâr-ı meşrûhunda vicâhen tasdîk ve şifâhen tahkīk eyledikden sonra mezbûr Mıgırdiç meclis-i mezbûrda Ayayi mahzarında i‘âde-i kelâm edip müvekkilelerim mezkûretândan Meyrem ve Nazar’ın zimmetlerinde cihet-i karz-ı şer‘îden merkūm İsayi[’ye] üç yüz kıt‘a tâmmü’l-vezn riyâlî kuruş vâcibü’l-edâ ve lâzımü’l-kazâ deynleri vardır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Mustafa b. Cafer, Abdurrahman Efendi el-imâm, Abdullah b. Sinan, Murtaza b. ( ) el-kayyum, Durmuş b. ( ) el-müezzin, Aleksan v. Dirke?, Mosi v. Ahîhân.