Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 145 Hüküm no: 144 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Çelebi b. Yusuf’un mülk menzilini Osman Ağa b. Rıdvan’a sattığı Vilâyet-i Rumeli’nde kasaba-i Yanbolu’da Bâli Subaşı mahallesinden Süleyman Çelebi b. Yusuf meclis-i şer‘de, işbu râfi‘ül-kitâb Osman Ağa b. Rıdvan mahzarında tav‘an ikrâr edip zikri âtî akdin sudûruna değin yedimde mülküm olup kasaba-i mezbûrede Akçaylı mahallesinde vâki‘ bir tarafı Mehmed Odabaşı mülküne ve bir tarafı Korucu Ali mülküne ve bir tarafı ba‘zan Bektaşzâde Mustafa Çelebi ve ba‘zan mezbûr Mehmed Odabaşı mülklerine ve bir tarafı tarîk-i âmma müntehî olup dâhiliye ve hâriciyeyi muhtevî dâhiliyesi bir tahtânî odayı ve havluyu ve anbarı ve çardağı ve hâriciyesi bir bâb tahtânî odayı ve ahûru ve samanlığı ve havluyu müştemil cemî‘ mülk menzilimi, [cemî‘] tevâbi‘i ile merkūm Osman Ağa’ya beş bin sekiz yüz fıddî râyic fi’l-akçeye bey‘-i bât ile bey‘ ve teslîm edip ol dahi iştirâ ve tesellüm eyledikden sonra semen-i mezbûr beş bin sekiz yüz akçeyi yedinden bi’t-tamâm ahz u kabz edip menzil-i mahdûd-ı mezbûru mahallinde zabt ve tasarrufa merkūm Osman Ağa’yı tarafımdan taslît eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Şeyhzâde Mehmed Efendi el-kadı, Yusuf Efendi el-hatîb, Abbas Bey b. Abdullah el-mütevellî, Uzun Hüseyin Ağa harmende [harbende] ağalarından, Ahmed Çelebi b. Abdürrahim, İsa Bey b. Ahmed el-muhzır.