Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 145 Hüküm no: 143 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Efendi b. Muslihiddin’in alacaklarının tahsilinde Mehmed Bey b. Veli’yi vekil tayin ettiği Medîne-i Selânik ahâlîsinden olup hâlâ mahmiye-i İstanbul[’da] Süleymaniye kurbunda Mülâzımîn odalarında ikāmet-i sefer ile mukīm olan Abdurrahman Efendi b. Muslihiddin meclis-i şer‘-i şerîfde, işbu râfi‘ül-kitâb Mehmed Bey b. Abdullah nâm kimesne mahzarında takrîr-i kelâm edip Medîne-i Münevvere’de zimem-i nâsda olan hukūkumu cem‘ [ve] tahsîle ve bana îsâle bundan akdem medîne-i mezbûrede sâkin el-Hâc Mehmed b. Veli nâm kimesneyi tarafımdan vekîl eylediğimde, ol dahi vekâlet-i merkūmeyi kabûl eylemişdi. Hâlâ mezbûr el-Hâc Mehmed vekâleti hasebiyle zimem-i nâsdan cem‘ eylediği hakkımı mezbûr el-Hâc Mehmed’den ahz u kabz ve bana îsâle ve ahz u kabz ve îsâle mütevakkıf olduğu umûrun cümlesine merkūm Mehmed Bey tarafımdan vekîl ve nâib-i menâb nasb eyledim dedikde, ol dahi vekâlet-i merkūmeyi kabûl ve hizmet-i lâzımesini edâya müte‘ahhid olmağın, mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Rebî‘ilevvel li sene tis‘a ve hamsîn ve elf. Şuhûdü’l-hâl: Hasan Çelebi b. Abd[ullah] Efendi, Ahmed Çelebi b. Abdullah, Osman Çelebi b. Mehmed, Yahya Bey b. Zekeriya, el-Hâc Hüseyin.