Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 147 Hüküm no: 147 Orijinal metin no: [34b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Hacı Ahmed Ağa’nın eski Kudüs Sancakbeyi Abdülhalim Bey’den alacağı olduğu Mahmiye-i İstanbul’da Mahmudpaşa kurbunda Dâye Hâtun mahallesinde sâkin Mehmed Çelebi b. el-Hâc Ahmed Ağa meclis-i şer‘-i şerîfde, sâbıkan Kudüs-i Şerîf beyi olan Abdülhalim Bey b. el-Hâc Mehmed Paşa tarafından husûs-ı âti’l-beyâna vekîl olup vekâleti bi mâ hüve nehcü’s-sübût şer‘an sâbite olan Mustafa Efendi b. Bayram mahzarında üzerine takrîr-i da‘vâ edip mezbûr Abdülhalim Bey zimmetinde yedimden müşterâ ve makbûz ma‘lûmetü’l-elvân ve’l-mikdâr emti‘a semeninde yüz on bin cedîd râyic fi’l-vakt akçe hakkım vardır, suâl olunup meblağ-ı mezbûrun müvekkil-i merkūm Abdülhalim Bey’den alıverilmesin taleb ederim [dedikde], vekîl-i merkūm Mustafa Efendi cevâbında, fi’l-hakīka müvekkilim mezbûr Abdülhalim Bey zimmetinde edâsı vâcib işbu müdde‘î Mehmed Çelebi’ye ma‘lûmetü’l-elvân ve’l-mikdâr emti‘a-i mütenevvi‘a semeninden yüz on bin cedîd akçe deyni vardır dedikde, vekîl-i merkūm Mustafa Efendi’nin ikrârı mûcebince meblağ-ı mezbûr yüz on bin cedîd akçenin müdde‘î-i mezbûra edâsına vekîl-i merkūm Abdülhalim Bey üzerine ilzâm olunup mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ilâhir li sene tis‘a ve hamsîn ve elf. Şuhûdü’l-hâl: es-Sâbıkūn.