Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 147 Hüküm no: 148 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki Beşe’nin alacak davasında Mustafa Paşa’nın kethüdası Mehmed Ağa b. Receb ile sulh olduğu Vilâyet-i Rumeli’nde bi’l-fi‘l Vahrı? serdârı olan Abdülbâkī Beşe b. Cafer meclis-i şer‘-i hatîrde, sâbıkan Vahrı? muhafazasında olan Mustafa Paşa’nın kethüdâları olan Mehmed Ağa b. Receb tarafından ikrâr-ı âti’l-beyânı tasdîka vekîl olup vekâleti bi mâ hüve nehcü’s-sübût şer‘an sâbite olan İbrahim Bey b. Abdullah mahzarında Vahrı? muhafazasında iken müvekkilim merkūm Mehmed Ağa kethüdâları olmağla beni ahz ve habs edip nâ-hak yedimden iki yüz riyâlî kuruşum ahz u kabz eylemişdi. Hâlâ merkūm Mehmed Ağa’ya zafer bulmağla, meblağ-ı mezbûru müvekkil-i mezbûrdan taleb ve da‘vâ eylediğimde ol dahi inkâr etmekle beynimizde münâza‘ât-ı kesîre vâkı‘a oldu. El-hâletü [hâzihî] muslihûn tavassut edip meblağ-ı mezbûr da‘vâsından beni merkūm Mehmed Ağa ile an-inkâr altı bin fıddî râyic fi’l-vakt akçe üzerine ve meclis-i akidde müşârun-ileyh bir mutallâ tülbent üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr altı bin akçeyi ve mârrü’z-zikr tülbenti meclis-i sulhda merkūm Mehmed Ağa yedinden ahz u kabz edip da‘vâ-yı mezbûra müte‘allika âmme-i da‘vâdan müvekkil-i müşârun-ileyhin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, mukırr-ı mezbûru ikrâr-ı meşrûhunda vekîl-i merkūm vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşer min şehri Rebî‘ilâhir li sene tis‘a ve hamsîn ve elf. Şuhûdü’l-hâl: Mustafa Çavuş b. Abdullah, Ahmed Bey b. Bali, el-Hâc Halil b. Mahmud, Süleyman Bey b. Şaban, Hüseyin b. Sefer, İsa Çelebi b. Ahmed, Yahya Bey [b.] Zekeriya.