Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 167 Hüküm no: 170 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Ağa b. Ali’nin Ünsî Abdullah Efendi’ye kefil olan, Abdurrahman Çelebi b. Mehmed ve Mehmed Beşe b. Şaban’dan alacağını talep etmesi Mahmiye-i İstanbul’da Şehzâde kurbunda Molla Hasan mahallesi sükkânından fahrü’l-akrân Halil Ağa b. Ali meclis-i şer‘-i hatîr-i lâzımü’t-tevkīrde umdetü’l-mevlâ’l-kirâm Ünsî Abdüllatif Efendi b. ( ) kethüdâsı Abdurrahman Çelebi b. Mehmed ve Çukadârı Mehmed Beşe b. Şaban mahzarlarında üzerlerine takrîr-i da‘vâ edip müşârun-ileyh Ünsî Abdüllatif Efendi zimmetinde deyn-i şer‘îden iki bin dört yüz riyâlî kuruş hakkım olup meblağ-ı mezbûra mezkûrândan her biri tarafından emr ve kabûlü hâviye kefâlet-i sahîha-i şer‘iyye ile kefîl olup meblağ-ı mezbûrü’n-na‘t iki bin dört yüz riyâlî kuruşdan bin iki yüz elli dört riyâlî kuruşunu bi’d-defe‘ât ahz u kabz eyleyip hâlâ müşârun-ileyh Ünsî Abdüllatif Efendi zimmetinde bâkī bin yüz kırk altı riyâlî kuruş hakkım vardır. Meblağ-ı mezbûr bin kırk altı riyâlî kuruşu işbu Abdurrahman Çelebi ve Mehmed Beşe’nin her birinden kefâlet-i mahkiyeleri hasebiyle taleb ederim. Suâl olunsun dedikde gıbbe’s-suâl merkūmân Abdurrahman Çelebi ve Mehmed Beşe cevâbları[nda] fi’l-hakīka müdde‘î-i mezbûr Halil Ağa’nın vech-i meşrûh üzre mûmâ-ileyh Ünsî Abdüllatif Efendi zimmetinde iki bin dört yüz riyâlî kuruş hakkı olup meblağ-ı mezkûra her birimiz tarafeynden emr ve kabûlü hâviye kefâlet-i sahîha-i şer‘iyye ile kefîl olduğumdan sonra meblağ-ı mezkûr iki bin dört yüz riyâlî kuruşdan vech-i muharrer üzre bin <> bin iki yüz elli dört riyâlî kuruşunu ahz u kabzdan sonra hâlâ müşârun-ileyh Ünsî Abdüllatif Efendi zimmetinde meblağ-ı mezbûrdan bâkī bin yüz kırk altı riyâlî kuruşuna bu vechile kefîlleriz deyû meblağ-ı müdde‘â bin yüz kırk altı riyâlî kuruşa her biri kefâletlerini tav‘an ikrâr ve i‘tirâf etmeğin ber-mûceb-i ikrâr kefâlet-i meşrûha meblağ-ı müdde‘â bin yüz kırk altı riyâlî kuruşu müdde‘î-i mezbûr Halil Ağa’ya edâ ve teslîme kefîlân-ı mezbûrân Abdurrahman Çelebi ve Mehmed Beşe üzerlerine hükm olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ulevvel li sene tis‘a ve hamsîn ve elf. Şuhûdü’l-hâl: Ahmed Efendi b. Abdülbâkī Efendi, Sunullah Efendi b. Ebûbekir. Mustafa Efendi el-kâtib, Yahya Bey b. Zekeriya.