Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 166 Hüküm no: 169 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil b. Ali ve Şemsihan bt. Abdullah’ın müştereken tasarruflarında olan evlerini Latif Usta bt. Sefer’e sattıkları Mahmiye-i İstanbul’da Aksaray kurbunda Koğacı Dede mahallesi sükkânından Halil b. Ali nâm kimesne ile Şemsihan bt. Abdullah nâm hâtun meclis-i şer‘-i hatîr-i lâzımü’t-tevkīrde işbu râfi‘atü’l-kitâb Latif Usta bt. Sefer nâm hâtun tarafından şirâ-i âti’l-beyâna vekîl olup vekâleti bimâ hüve nehci’s-sübût şer‘an sâbite olan Mahmud Çelebi b. Hüseyin mahzarında tav‘an her biri ikrâr ve i‘tirâf edip işbu akdin sudûruna değin ale’l-iştirâk yedimizde mülkümüz ve hakkımız olup mahalle-i mezbûrede vâki‘ bir tarafı Koğacıdede Vakfı olan menzile ve iki tarafı tarîk-i âmma müntehî bir bâb fevkānî ve yedi tahtânî odaları ve havluyu ve kenîfi müştemil cemî‘ menzilimi âmme-i tevâbi‘ ve levâhıkı ve kâffe-i hukūk ve mürâfıkı ile vekîl-i mezbûr Mahmud Çelebi’ye yirmi bin cedîd fıddî râyic fi’l-vakt akçeye bey‘-i bâttla bey‘ ve teslîm edip ol dahi müvekkilesi için vekâleten iştirâ ve kabûl ve tesellüm eyledikden sonra semen-i merkūm yirmi bin cedîd akçeyi müvekkileden ve vekîl-i merkūm Mahmud Çelebi’nin yedinden bi’t-tamâm ve’l-kemâl alıp kabz eyledik. Ba‘de’l-yevm cemî‘ menzil-i mezbûr merkūm Mahmud Çelebi’nin müvekkilesi mezkûre Latif Usta’nın mülk-i mahzı ve hakk-ı sırfı olmuşdur. Keyfe mâ yeşâ ve yahtâr mutasarrıfe olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ali Efendi b. Abdullah el-imâm, Mustafa Halîfe b. el-müezzin, İsmail b. Mehmed, Şaban Çelebi b. İbrahim, Hacı Ahmed b. Sefer, Kuşakçı el-Hâc Mehmed b. Receb, Sinan b. Ali, Mehmed b. Mustafa.