Rumeli Sadareti Mahkemesi 80 Numaralı Sicil (H. 1057-1059/M. 1647-1649) cilt: 15, sayfa: 168 Hüküm no: 172 Orijinal metin no: [41a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdullah b. Hüseyin’in vârislerinin, hisselerini diğer vâris Ayşe bt. Hacı Ahmed’e sattıkları Dârü’s-saltanati’s-seniyye mahmiye-i Kostantıniyye mahallâtından Salih Paşa mahallesinde sâkin iken bundan akdem vefât eden Abdullah b. Hüseyin’in verâseti zevce-i metrûkesi Ayşe bt. el-Hâc Ahmed ve dayısı oğulları Mehmed ve Mustafa ibney Abdülganî’ye ve mahmiye-i mezbûrede Gül Câmi‘ kurbunda Molla Hüsrev mahallesinde sâkin li ebeveyn kız karındaşı Fâtıma’nın sadrî oğlu Fazlı b. Hanefi’ye ve yine li ebeveyn kız karındaşı Döndü’nün sadrî oğlu Mehmed b. Mümin’e ve yine li ebeveyn kız karındaşı Medîne’nin sadrî oğlu Mehmed b. İsmail’e ve yine li ebeveyn kız karındaşı Hâcce Molla’nın sadrî oğlu Maksud b. Üveys nâm kimesneler mahzarında olduğu şer‘an mütehakkık oldukdan sonra mezbûrûn Mehmed b. Mümin ve Fazlı b. Hanefi ve Mehmed ve Mustafa ibney Abdülganî ve Mehmed b. İsmail ve Maksud b. Üveys meclis-i şer‘-i hatîr-i lâzımü’t-tevkīrde tereke-i mezbûra vâzı‘atü’l-yed olan mezbûre Ayşe tarafından ikrâr-ı âti’l-beyânı tasdîka vekîl olup vekâleti bimâ hüve nehci’s-sübût şer‘an sâbite olan işbu râfi‘ül-kitâb İbrahim Beşe b. El-Hâc Ahmed mahzarında her biri tav‘an ikrâr ve i‘tirâf edip tereke-i müteveffâ-yı mezbûrdan olup müvekkile-i mezbûre Ayşe Hâtun vaz‘-ı yed eylediği celîl ve hakîr beynimizde ma‘lûm cemî‘ terekeden bi hasebi’l-irsi’ş-şer‘î bize isâbet ve intikāl eden sülüs-i erbâ‘ı hakkımız mukābelesinde müvekkile-i mezbûre ayşe ile şerâyiti’s-sulhu hâvî mevâni‘den ârî sulhu’t-tehâruci’ş-şer‘î sehm-i şer‘î tarîki üzre altı bin fıddî râyic fi’l-vakt akçe üzerine sulh olup bedel-i sulh meblağ-ı mezbûr altı bin akçeyi meclis-i sulhda merkūm Ayşe Hâtun yedinden tamâmen ahz u kabz edip, tereke-i müteveffâ-yı mezbûra müte‘allika âmme-i da‘vâdan müvekkile-i mezbûrenin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dediklerinde mukırrûn-ı mezbûrûnun vech-i meşrûh üzre cârî ve sâdır olan ikrârlarını el-mukarrun lehü’l-mezbûr vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Rebî‘ulâhir li sene tis‘a ve hamsîn ve elf. Şuhûdü’l-hâl: Ali Efendi b. Mahmud, el-Hâc İbrahim [b.] el-Hâc Ahmed, Sinan Çavuş b. Mehmed, Bayram b. Müstecâb, Mehmed b. Nasuh, Mustafa Beşe b. Zülfikār, Kâtib Mehmed Çelebi b. ( ), Kapıcı Mehmed Ağa b. ( ).